"Zirə"nin Avropa Liqasının 1-ci təsnifat mərhələsində qarşılaşacağı komanda bəllidi. Söhbət "Şerif"dən gedir.

Bilindiyi kimi, "qartallar" tarixində ikinci dəfə Avropa Liqasında çıxış edəcək. Qəsəbə təmsilçisinin bu turnirdə debütü 2017/18 mövsümünə təsadüf edib. Onda ilk mərhələdə Lüksemburq “Differdanj”ının öhdəsindən gələn “Zurə” 2-ci mərhələdə "Astra" (Rumıniya) ilə bacarmayıb - 1:3, 0:0.

"Şerif" isə bu mənada xeyli fərqlənir. Daha dəqiqi, moldovalıların avrokubok təcrübəsi daha zəngindi. Düzdü, burda “moldovalılar” ifadəsi bir qədər şərti xarakter daşıyır. “Şerif” şübhəli keçmişə malik iki şəxsin – Viktor Quşanla İlya Kazmalının yaratdığı, Moldovanın ərazi bütövlüyünü şübhə altına alan separatçı Dnestryanı Respublikanın futboldakı səfiridi.

1997-ci ildə yaranan klub fəaliyyətinə aşağı liqada başlasa da, ilk cəhddə elitaya yüksəlməyi bacarıb. Maraq üçün qeyd edək ki, komandanın ilk baş məşqçisi azərbaycanlı mütəxəssis Əhməd Ələsgərov olub, rəhbərlik premyer-liqaya çıxdıqdan sonra onunla vidalaşıb.

"Şerif" 2023/24 mövsümünü “Petrokub”dan 6 xal geri qalmaqla 2-ci pillədə tamamlayıb. Yeddi futbolçusu Moldova millisinin üzvüdü. 36 oyunçudan 28-i legionerdi.

Klubun ümumi dəyəri "Transfermarkt"a görə 10,5 milyon avrodu, ev oyunlarını "Şerif Main Arena"da keçirir. Stadion 12746 tamaşaçı tutumuna malikdi və avrokubok matçlarını keçirmək üçün yararlıdı.

Avrokubok matçları demişkən, "Şerif" bizə yad rəqib deyil. "Qarabağ" Tiraspol təmsilçisini nə az, nə çox - üç dəfə mübarizədən kənarlaşdırıb. Çempionlar Liqasının 2017/18 (evdə 0:0, səfərdə 2:1) və 2020/21 (2:1), Avropa Liqasının 2018/19 mövsümlərində (səfərdə 0:1, evdə 3:0) ağdamlılar “Şerif”i mübarizədən kənarlaşdırıb. Həmin “Qarabağ”ın aparıcı fiqurlarından biri Rəşad Sadıqov hazırda “Zirə”ni çalışdırır.

Ümumiyyətlə, "Şerif" UEFA turnirlərində 1999/00 mövsümündə debüt edib. İndiyə qədər bir dəfə Çempionlar Liqasının, dörd dəfə Avropa Liqasının qrupunda çıxış edib.

Komandanın baş məşqçisi Yuri Quradı. Ukraynalı mütəxəssisin 48 yaşı var. Xatırladaq ki, Avropa Liqasında 1-ci təsnifat mərhələsinin ilk oyunları iyulun 11-də, cavab görüşləri isə 18-də keçiriləcək.

KƏNAN BAHADIR