Futbol üzrə Avropa çempionatında son bir həftəyə qədəm qoyuruq.

Turnirin sırf futbol yönləri ilə bağlı vaxtaşırı müxtəlif məqamlara toxunuruq. Ancaq daha bir sürpriz problem var ki, yəqin sizin də diqqətinizi çəkib. Belə səviyyəli turnirdə hədsiz çox sayda azarkeş oyun vaxtı yaşıl meydana qaçır.

Azarkeşin meydana çıxması ilə bağlı ilk hala turnirin elə ikinci günündə - İtaliya – Albaniya oyununda rast gəlindi. Yekəpər kişi Albaniya yığmasının bir neçə oyunçusunun əlini sıxmağa və qırmızı fonda qara qartalın təsvir olunduğu bayrağı yelləməyə imkan tapdı. Ancaq qaçıb aradan çıxa bilmədi. Stüardın peşəkar futbolçulara xas badalaq fəndindən sonra fanat qazona yıxıldı – onu meydandan çıxarıb polisə təhvil verdilər.

Nə qədər təəccüb doğursa da, ilk qalmaqaldan sonra stüardların ayıq-sayıqlığı artmadı. İyunun 17-də keçirilən Belçika – Slovakiya oyununun gedişində meydana şığıyan fanat Kevin de Bruyne ilə selfi etdirməyə çalışdı. Elə həmin gün azarkeşlər üzündən Münhendə keçirilən Rumıniya – Ukrayna oyununun gedişində də fasilə yarandı.

Hoqqabazlıq iyunun 19-da da davam etdi. 2,5 min avro cərimə və AÇ-2024-ün qalan oyunlarına giriş imkanına yasaq qoyulması həmin gün Hamburqda keçirilən Xorvatiya – Albaniya oyununun axarına müdaxilə edən üç albanın gözünü qorxutmadı. Yekəpər kişiləri “qol-budaq etmək” bir neçə stüard üçün belə çətin idi. Teletranslyasiya vaxtı fanatların meydana qaçması bəzən göstərilmir. Televiziya rejissoru, adətən, futbolçuları və ya məşqçiləri iri planda göstərməyə köklənir, ancaq tribunaların səs-küyünə əsasən meydanda hansısa qeyri-adi hadisənin yaşandığı aydın olur.

Ən kiçik qayda pozucusu isə Almaniyada yaşayan türkəsilli Berat Uluğdu. O, Türkiyə - Portuqaliya oyununun gedişində Kriştiano Ronaldo ilə selfi etdi. Portuqaliya yığmasının kapitanı hətta onun telefonunun kamerasına gülümsədi. Türkiyəli uşaq oyundan sonra jurnalistlərə bu ideyanı çoxdan planlaşdırdığını, hətta doğma şəhəri Kasselin U-11 komandasından olan oyundaşlarını da xəbərdar etdiyini deyib. Oyun vaxtı atasına ayaqyoluna getdiyini deyərək aradan çıxan Berat arzusunun arxasınca qaçıb – meydana şığıyaraq Kriştiano ilə şəkil çəkdirib. Ancaq stüardların əlindən qaça bilməyib. Beratın atası Çətin Uluğ Ronaldonun fanata xoş münasibətinə görə cərimədən qaça bildiklərini etiraf edib. Ancaq ata-oğul AÇ-nin sonrakı oyunlarını izləmək imkanından məhrum olundu. Bu oyunda Kriştiano ilə selfi etdirmək üçün meydana axışan azarkeşlərin sayı baxımından rekord müəyyənləşdi. Onlardan ikisi ulduza yaxınlaşa bildi ki, bu da Portuqaliya yığmasının kapitanında kəskin narazılıq doğurdu. Daha üçü futbolçuya tərəf qaçarkən yaxalandı.

Türkiyə - Portuqaliya oyunundan sonra qitə futbol qurumu turnirin qalan oyunlarında təhlükəsizlik tədbirlərinin sərtləşdirilməsinin zəruriliyi ilə bağlı bəyanatla çıxış etdi. Bu da işə yaramadı!
Yeniyetmə Beratın “qəhrəmanlığını” başqa uşaqlar da turnirin qalan oyunlarında təkrarlamaq istədi. İyulun 1-də stüardlar Fransa və Belçika yığmaları arasındakı 1/8 final oyununda Kilian Mbappenin fanatını gözdən qaçırdı. Stüardların nəzarətindən çıxan cocuq “Real”ın yeni futbolçusuna yetişə bildi. İyulun 2-də keçirilən Rumıniya – Niderland oyununda da meydana yeniyetmə azarkeş çıxdı. Onun məqsədi şəkil çəkdirmək yox, rumınların qapıçısı Florian Nitseyə yardım etmək idi. Simasından xoşbəxtlik yağan “əvəzedici” qapıçını meydandan çıxardılar. Bundan dərhal sonra isə Rumıniya yığması 3-cü qolu buraxdı.
Hələ ki UEFA-ya bütün cərimələri Almaniya Futbol İttifaqı ödəyir. Meydana qaçan hər azarkeşə görə təxminən 10 min avro!