Növbəti nəhəng turniri geridə qoymaq üzrəyik.

Futbolsevərlərə əsrarəngiz emosiyalar bəxş edən AÇ-2024-ün bitməsinə cəmi 3 oyun qalıb. Bu gün və sabah keçiriləcək yarımfinallardan sonra turnirin şah oyununun iştirakçıları bəlli olacaq.

yarımfinal
9 iyul
İspaniya – Fransa 2:1
Lamin Yamal, 21. Dani Olmo, 25 - Kolo Muani, 9.
Hakim: Slavko Vinçiç (Sloveniya)
Cəzalılar: Karvaxal, Le Norman/yoxdu
Stadion: “Allyants Arena” (Münhen)
Əvvəlki oyunlarının balansı: +16=7-13

Bəlkə də turnirdən öncə bu komandaların duelində fransızlar favorit sayılırdı. Amma konkret AÇ-2024-də sərgilənən futbol baxımından İspaniya nəinki Fransanı, hətta bütün komandaları üstələyir. Qapıya və “çərçivə”yə ən çox zərbə endirən, xG statistikasına görə ən çox qol epizodu yaxalayan, eləcə də turnirin ən məhsuldar komandası statusunda olan məhz ispanlardı. Fransaya gəlincə, loru dildə desək, bu komandanın hələ ki “hansı məzhəbə qulluq etdiyini” heç kim bilmir. İlk baxışdan əzəmətli hücum xəttinə malik olan fransızlar bu turnirdə rəngarəng və məhsuldar oyunları ilə futbolsevərləri valeh etməliydilər. Ən azı kağız üzərində belə görünürdü. Amma reallıq tam fərqlidi. Artıq yarımfinaldı, amma Fransa hələ də oyun epizodundan qol vurmayıb! Didye Deşamın kollektivi bura qədər cəmi 3 dəfə fərqlənib ki, bunlardan ikisi rəqiblərin avtoqolu, biri isə Mbappenin penalti qolu sayəsində vurulub.

Amma necə deyərlər, stəkanın yarısı boşdusa, yarısı da doludu. Fransanın hücumu axsayırsa, müdafiəsi əksinə, çox güclüdü. Komanda 5 oyunda cəmi 1 top buraxıb (onu da penaltidən) və buralara qədər məhz müdafiənin hesabına gəlib. Yəni İspaniya ilə Fransanın dueli kağız üzərində titanların döyüşü kimi görünürsə, reallıqda turnirin ən yaxşı hücum edən komandası ilə ən yaxşı müdafiə olunanı qarşılaşacaq. İspaniya Avropada və dünyada ağalıq etdiyi 2008-12-ci illərdən bu yana heç bir nəhəng turnirdə finala yüksələ bilməyib. Komanda ötən qitə turnirində yarımfinalda italyanlara penalti seriyasında uduzmuşdu. Bu dəfə “buğalar”ın finala yüksəlmək üçün gözəl şansı var. Fransa isə son 8 ildə 4-cü dəfə nəhəng turnirin finalına yüksələ bilər.

Son dönəmlərdə bu komandaların yolları o qədər də çox kəsişməyib. Son oyun 2021-də Millətlər Liqasının finalına təsadüf edib. Həmin vaxt “San Siro”da Fransa 2:1-lik əzmkar qələbə qazanmışdı. 2008-13-cü illərdə İspaniya Fransaya qarşı 5 oyunluq məğlubiyyətsiz seriya yaxalasa da, son 3 matçın ikisində fransızlar sevinib.