Çərşənbə axşamı Moskvada 5 ölkədən olan 10 elit qrossmeysterin qatıldığı “Şahmat ulduzları 4.0” turnirinə yekunu vurulub.

Çempionluğu rusiyalı Vladislav Artemyev bayram edib, Teymur Rəcəbov isə 2-ci yeri tutub. Həmyerlimiz rapiddə Artemyevdən yarım xal geri qalıb, blitsdə isə 4-cü olub. O, turnir başa çatandan sonra “Sport-Ekspress”in bəzi suallarını cavablayıb.

- Ümumdünya Şahmat Olimpiadasına iki aydan bir qədər artıq vaxt qalıb. Bizə son müsahibədə bu turnirin sizin üçün çox böyük önəm daşıdığını demişdiz.
- Əlbəttə, ilin ən vacib yarışlarından biridi. İndi yığmanın yekun heyətini, kimin kapitan olacağını müəyyənləşdirmək lazımdı. Bugünlərdə yığmanın heyətinə düşməyə bütün namizədlər “Baku Open-2024” festivalında çıxış edir. Ondan sonra kimin hansı formada olduğu bilinəcək. Ümumdünya Şahmat Olimpiadası ağır turnirdi. Bütün yığmalar əsas heyəti gətirəcək, yüklənmə və məsuliyyət son həddə çatacaq. Gənc şahmatçılar belə sınağa tam öyrəşməyib. Baxaq görək onlar Budapeşdə özünü necə göstərəcək.

- Turnirin favoriti kimdi?
- Aydındı ki, Hindistanla ABŞ. Hər iki yığmanın heyətində əmsalı 2700-dən yuxarı dörd şahmatçı var, üstəlik ehtiyat oyunçuları da elitadandı. Bizdə də üç oyunçunun reytinqinin 2700-dən artıq olduğu vaxt var idi. Bir dəfə hətta Azərbaycanın birdən-birə üç təmsilçisi top-10-da idi. Kiçik ölkə üçün qeyri-adi nəticədi. Bu il bizə çətin olacaq, ancaq mübarizə aparmağa çalışacağıq. Uğur amili də çox vacibdi. İstənilən heyətlə medallara iddia edəcək Çini də favoritlər sırasına aid etmək lazımdı. Rusiya Macarıstan Olimpiadasına qatılsaydı, bu sözləri sizin ölkə haqda da demək olardı.

- Bəs rapid və blits üzrə dünya çempionatında oynamağı planlaşdırırsızmı?
- Yox. Bu turnirlərdə dekabrın sonunda oynamağın nəyə lazım olduğunu anlamıram. İstənilən şahmatçı üçün ən qorxunc tarixdi. FİDE il ərzində elita üçün o qədər də çox tədbir keçirmir. Hamını razı salan 5 gün tapmaq olardı. Təqvimin tərtibi üzrə mütəxəssis olmasam da, FİDE-nin hər hansı başqa variantı yoxdusa, təəccüblənərəm.