Qəbələdə keçirilən “Vüqar Həşimov Memorialı”nda uğurlu nəticə göstərməyən, Şəhrəyar Məmmədyarovla 6-7-ci yerləri bölüşən Teymur Rəcəbov Bakıya dönəndən dərhal sonra Moskvanın yolunu tutub.

2019-un Dünya kubokunun qalibini Rusiya paytaxtına aparan səbəb var. Belə ki, həmvətənimiz bu gün start götürən, “Şahmat ulduzları 3.0” adlanan sürətli şahmat üzrə beynəlxalq turnirə qatılıb. Dekabrın 14-19-u aralığında “Lujniki”də keçiriləcək turnirin iştirakçıları arasında Teymurla yanaşı, Sergey Karyakin, Aleksandr Qrişuk, Vladislav Artemyev, Aleksandra Qoryaçkina, Yekaterina Lahno, Ernesto İnarkiyev və Yevgeni Tomaşevski (hamısı Rusiya), həmçinin Raunak Sadhvani (Hindistan) və Fransisko Pons Valyexo (İspaniya) da var.

“Football-plus.az” xəbər verir ki, qrossmeysterlər 15 milyon rubl (285 min Azərbaycan manatı – red.) uğrunda mübarizə aparacaq. Rapid üzrə yarışlar dekabrın 14-16-sı aralığında, blits üzrə yarışlar isə 18-19-da keçiriləcək. Təşkilatçılar bu iki yarışın nəticəsini üst-üstə gələcək.