Son bir ayın ən çox müzakirə olunan mövzularından biri də Kadi Borgesin “Qarabağ”a mümkün dönüşüdü.

“Football-plus.az” xəbər verir ki, bu məsələ ətrafında maraqlı durum yaranıb. Braziliyalı vinger Azərbaycana can atır, “Krasnodar” onun üçün xərclədiyi məbləğin, heç olmasa, yarısını xilas etməyə çalışır, bu komandanın nə edəcəyini bilməyən köhnə-yeni baş məşqçisi Murad Musayev isə futbolçuya o qədər də güvənmir. İyunun 15-də məzuniyyətdən sonra toplanışa başlayan “öküzlər”in yoxlama oyunlarının protokoluna baxanda da bu, açıq-aydın hiss olunur.

Belə ki, “Krasnodar” iyunun 23-də “Kuban”ı 1:0, iyunun 29-da isə Mahaçqala “Dinamo”sunu 2:0 hesabıyla məğlub edib. Kadi ilk oyunda 45, ikincidə isə cəmi 10 dəqiqə meydana olub – 61-ci dəqiqədə oyuna qoşulub, 7 dəqiqə sonra sarı vərəqə alıb, 71-ci dəqiqədə Umnikovla əvəzlənib. Hər şeydən belə görünür ki, Musayev Kadiyə güvənmir, sadəcə, formada olması, sonradan başqa kluba satıla bilməsi üçün müəyyən oyun vaxtı qazandırır. O başqa klub “Qarabağ” da ola bilər, bir başqası da. Bizə gözləmək qalır!

ORXAN