“Sabah”ın baş məşqçisi Krunoslav Renduliçin "football-plus.az"a müsahibəsi...

– Yay fasiləsində vətəniniz Xorvatiyaya dönmüşdüz. Orda sizi necə qarşıladılar? Məhz sizə görə premyer-liqamıza marağın artdığını deyə bilərikmi?
– Bəli, Xorvatiyada dincəldim və bura qayıtdım. Əlbəttə, Azərbaycan çempionatı yerli futbolsevərlərin diqqətini cəlb edir. Bu məsələylə bağlı mənimlə maraqlananlar çoxdu.

– Avrokuboklara və yeni mövsümə hazırlıq prosesi necə gedir? Dəyişiklikləri necə dəyərləndirirsiz?
– Hazırlığa iyunun 20-də Masazırda başladıq. 24-də isə Qəbələyə yollandıq. Hər şey qaydasındadı. Ciddi problemin olduğunu deyə bilmərəm. Bu gün təlim-məşq toplanışının ikinci, yəni Qəbələ mərhələsini başa vurduq. Sabah Sloveniyaya gedirik.

– Artıq bir neçə transfer reallaşdırılıb. Yəqin ki, Coy-Lens Mikelsin “Sabah”a qayıtmasının futbol ictimaiyyəti tərəfindən birmənalı qarşılanmadığından xəbərdarsız. Mikels haqda fikirləriniz necədi?
– Ayrı-seçkilik etmək istəmirəm. Komandadakı bütün futbolçular yaxşı keyfiyyətlərə malikdi. Bura həm Coy-Lens Mikelsi, həm də İvan Lepinitsanı aid edərdim. Oyunçularımdan razıyam. Yeni gələnlərin də kollektivə çox kömək edəcəyini düşünürəm. Hər halda, yaxşı oyunçulardı. Başqa nəsə deməyə ehtiyac yoxdu.

– Çox güman, daha bir neçə futbolçuyla anlaşacaqsız. Maraqlıdı ki, İvan xorvatiyalıdı. Vətəninizdən başqalarını da “Sabah”a gətirməyiniz mümkündü?
– Komandanın komplektləşdirilməsi istiqamətində işlər görürük. Klubun skautinq heyətiylə birgə çox sıx qrafik üzrə çalışırıq. Vaxtımız azalır. Müəyyən namizədlər üzərində dayanmışıq. Lakin rəsmi razılıq əldə edilmədən maraqlandığımız oyunçularla bağlı hər hansı məlumat verə bilmərəm.

– Premyer-liqa və Konfrans Liqası ilə bağlı hədəfiniz nə olacaq? Rəhbərliyin sizdən konkret tələbi varmı?
– Ötən mövsüm ölkə çempionatında 3-cü yeri tutduqsa, Konfrans Liqasına vəsiqə qazandıq. Azarkeşlərin bizdən gözləntiləri böyükdü. Bunu nəzərə alsaq, minimum hədəfimiz həmin nəticələri təkrarlamaq olacaq. Ümumiyyətlə, həm Avropada, həm də Azərbaycanda daha yaxşı işlər görmək istəyirik. Əlbəttə, bunu bacarmaq üçün çox çalışmalıyıq. Yalnız məşq etməklə planlaşdırılan, qarşımıza qoyulan hədəfə çata bilərik. Bizim üçün hər matç vacibdi. Hamısına yetərincə ciddi yanaşacağımıza əmin ola bilərsiz.

– Yeri gəlmişkən, azərbaycanlı futbolçularla münasibətiniz necədi? Onlar haqda nə düşünürsüz? Xüsusilə gənclər perspektiv vəd edirmi?
– Əlbəttə. Burda çox yaxşı oyunçular var. Komandamda çıxış edənlərlə münasibətim daha yaxşıdı. Digər tərəfdən, keyfiyyətli futbolçular az deyil. Ümid edirəm ki, zamanla sayları artaacaq.

– Avrokuboklara gəlincə, Konfrans Liqasındakı rəqibiniz “Sabah”dan üstün görünür. Həm heyət, həm maliyyə, həm də təcrübə baxımından öndə olduqlarını nəzərə alsaq, şansınız nə qədərdi? Ümumiyyətlə, rəqibin cütün favoriti olması sizi çəkindirirmi?
– Bəli, sirr deyil ki, püşk bizi mümkün olan ən çətin rəqiblə üz-üzə qoydu. “Makkabi”nin favorit olmasıyla razıyam. Lakin bizim də komandamız yaxşıdı. Sloveniya toplanışında bu oyunlara ciddi hazırlaşacağıq. Həmçinin rəqibi diqqətli və ətraflı təhlil edəcəyik. Məqsədimiz matç gününə qədər yorulmadan çalışmaq, ən əsası, özümüzə köklənmək və kollektivi daha da təkmilləşdirmək olacaq. Bizə inananları məyus etmək istəmirik.

Qeyd edək ki, “Sabah” Sloveniyanın Çatej-ob-Savi qəsəbəsində məskunlaşıb. “Bayquşlar” burda dörd yoxlama oyunu keçirəcək. İyulun 6-da “Koper” (Sloveniya), 10-da “Çukariçki” (Serbiya), 13-də “Krivbass” (Ukrayna), 17-də “Rux”la (Ukrayna) qarşılaşacaq komanda 18-də Bakıya qayıdacaq. “Makkabi” ilə matçlar isə iyulun 25-də səfərdə, avqustun 1-də evdə olacaq.

KƏNAN BAHADIR