AÇ-2024-də danışılmış oyun qalmaqalı! – baş məşqçi özündən çıxdı
AÇ-2024-ün qrup mərhələsinin 3-cü turunun Slovakiya – Rumıniya matçı “sülh”lə bitdi – 1:1.
Bilindiyi kimi, oyunun heç-heçə bitməsi hər iki millinin 1/8 finala vəsiqə qazanması demək idi ki, belə də oldu. Digər tərəfdən, Ukrayna – Belçika qarşılaşmasında da heç-heçə qeydə alındı. Belədə E qrupunun bütün yığmaları qrup mərhələsini 4 xalla başa vurdu. Burda uğursuzluqla üzləşən Ukraynadı. Çünki qrupdan “sağ çıxmaq” üçün rəqibi məğlub etməkdən başqa yolu olmayan kollektiv heç-heçədən sonra top fərqinə görə turnir cədvəlinin sonuncu pilləsində qərarlaşdı.
“Football-plus.az”ın məlumatına görə, belə durum ukraynalı azarkeşləri qəzəbləndirib. İş o yerə çatıb ki, tərəfdarlar Slovakiya və Rumıniya yığmalarını oyun alğı-satqısında günahlandırıb. Onlar “sülh”ün komandalar üçün sərfəli nəticə olduğunu, bu üzdən qəsdən bir-birinə qalib gəlmədiklərini deyib. Azarkeşlərin ciddi təzyiqi Rumıniyanın baş məşqçisi Edvard Yordaneskunu özündən çıxarıb. Mütəxəssis ittihamlara belə cavab verib:
“Bu iddiaları səsləndirənlər bizdən üzr istəməlidi. Hər iki komanda 90 dəqiqə ərzində əlindən gələni etdi. Futbolçularımıza və ləyaqətimizə palçıq atmaq kobud və utandırıcı hərəkətdi. Rumıniya meydanda xarakter nümayiş etdirdi. Demək olar ki, bütün stadion sarı rəngə boyanmışdı. Azarkeşlərimiz bizi nə avtovağzalda, nə məşqdə, nə də oteldə tək qoydu. İnanılmaz hisslər yaşadıq. Ümid edirik ki, belə davam edəcək. Bacardığımız qədər irəli getmək istəyirik”.
KƏNAN BAHADIR
Digər xəbərlər
