“Biz rəqib komandanı çox yaxşı analiz etmişdik. Hansı cəhətləri üstündü, komanda harda axsayır – bunları müəyyənləşdirdik. Hər iki nəticəyə baxanda da həmin axsayan tərəflərdən istifadə edib qol vurduq. Rəqib, doğrudan da, yaxşı komanda idi. Hansısa vəziyyətlərdə bəzən bizdən daha üstün oynayırdı. Sadəcə, biz plana uyğun hərəkət etdik və 90 dəqiqə ərzində nizam-intizamı pozmadıq. Çalışdıq ki, məşqçinin verdiyi tapşırıqları yerinə yetirək. Sonda da istədiyimiz nəticəni əldə etməyi bacardıq”.

“Neçə oyundu ki, "Cəbrayıl"da Cavidə kömək edirəm. Özü ilə də söhbət edəndə dedim ki, Cavid, oynamaq istəyirəm. Özümdə hələ o gücü hiss edirəm. Meydandan kənar qalanda insan darıxır və hiss edirsən ki, uzun illər premyer-liqada yığdığın təcrübə ilə rahat səkildə 2-ci liqada oynaya bilərsən. Oyunumla da heç də gənclərdən geri qalmırdım. Növbəti mövsümdən komandanın hədəfi nə olacaqsa, bu haqda məlumat veriləcək. Yəqin yaxın zamanda təyin edəcəklər ki, kim qalacaq, kim isə gedəcək. Əlbəttə, komandada qalmaq istəyərəm. Futbol üçün darıxdığımdan bunu istəyirəm. Sadəcə, bir əngəl var ki, iki yerlə müqaviləyə icazə verilmir. Hazırda "Araz-Naxçıvan"da məşqçiyəm, rəsmi müqaviləm var. Reqlamentə görə əlavə olaraq 1-ci liqada müqavilə bağlaya bilmərəm. Ona görə seçim olacaq. O nöqteyi-nəzərdən, yəqin ki, "Cəbrayıl"la kariyeramı davam etdirə bilməyəcəm. 2-ci liqada qayda icazə verirdi, bundan sonra yox. Məqsədimizə çatdıq, bu səbəbdən mənim missiyam bitmiş sayılır. "Araz-Naxçıvan"da məşqçi kimi qalsam, əlbəttə, məşqçilik yolunu seçəcəm. Çünki məşqçi kateqoriyam var. Naxçıvan komandası ilə neçə illərdi çalışıram. Rəhbərlik də "Keşlə", "Şamaxı " vaxtından tanıdığım şəxslərdi. Həmişə dəstək olublar. Əlbəttə, bu yolda mənə dəstək olduqları üçün məşqçilik kariyeramı seçəcəm. Təbii ki, “Araz-Naxçıvan” etimad göstərib məşqçi kimi saxlasa, o komandanı qoyub heç yana gedən deyiləm. Ancaq qayda dəyişsə, niyə də yox?! Həm futbolçu, həm də məşqçi işləməyə icazə verilsə, hər hansı komandaya kömək etmək istəyərəm”.