Maraqla gözlənilən oyun rəqibin ciddi təzyiqiylə başladı.

İlk dəqiqədə künc zərbəsi qazanan komanda ilk cəhddə uğursuz oldu. Daha dəqiq desək, Amin topu meydandan çıxardı. Belədə ikinci dəfə şans qazanan rəqib fərqləndi. Tagıbergenin cərimə meydançasına göndərdiyi topu Voroqovski baş zərbəsiylə qapıdan keçirdi. “Cavab atəşi” üçün dərhal hərəkətə keçən millimizin ilk təhlükəli hücumu özünü çox gözlətmədi. Burda Elvinin qapıya zərbəsi qeydə alındı ki, Zarutski operativ müdaxiləylə hesabın bərabərləşməsinə mane oldu. Ruhdan düşmədən irəli atılan yığmamızın növbəti tutarlı hücumunun qolla nəticələnməsinə isə tir imkan vermədi. Belədə Ramilin ötürməsindən sonra “çərçivə”ni nişan alan Emin məyusluq yaşadı. Bəxtini sınayan digər futbolçu Toral oldu. Onun 8-ci dəqiqədəki zərbəsini Zarustki zərərsizləşdirdi. Hadisələrin axarı yığmamızın oyuna nəzarəti ələ almaq və “1 nömrə” kimi çıxış etmək istəyinin oyun tərzinə yansımasıyla müşayiət olundu. Lakin bizimkilərin həlledici məqamlarda gah qeyri-dəqiq olması, gah da təkbətək mübarizələrdə məğlubiyyəti başverənlərin özünü nəticədə göstərməsinə şərait yaratmırdı. Bu ərəfədə Samorodovun uğursuz zərbəsini izlədik ki, burda Şahurddinin işi çətin olmadı. Ardından Tagıbergenlə Orazovun fərqi artırmaq cəhdləri puç oldu. Alekseyin qapını uzaqdan nişan aldığı epizod isə statistikadan başqa nəyəsə xidmət etmədi. Millimizin ciddi təzyiqiylə üzləşən rəqib xoşbəxtliyi əks-hücumlarda axtarmağa başladı ki, istəyinə 28-ci dəqiqədə çatdı. Alekseyin qeyr-dəqiq ötürməsi üzündən topu ələ keçirən Sadıbekov Aymbetova, o isə Samorodova çatdırdı ki, sonuncu fərqi artırdı. Bundan sonra, Emin, Anton və Ramilin cəhdlərinə şahidlik etsək də, nəticə istənilən kimi olmadı. Nəhayət, fərqi minimuma endirən futbolçu Mahir oldu. O, Eminin 42-ci dəqiqədə cərimə meydançasına göndərdiyi topu tora qovuşdurdu. Birinci hissənin sonuna qədər daha bir neçə qol epizodu ələ düşsə də, dəyərləndirmək mümkün olmadı. Yenə də millimiz geridönüş edə biləcəyinin mesajını verdiyindən bundan sonra daha həyacanlı dəqiqələrə şahidlik edəcəyimiz bəlliydi.

İkinci yarıda ilk təhlükəli vəziyyət Tagıbergenin uğursuz zərbəsiylə tamamlandı. Ardından Toralla Mahirin hədəfə çatmayan cəhdləri qeydə alındı. 50-ci dəqiqədə Kuatın Emreliyə qarşı kobud oyunu penaltinin təyin edilməsiylə nəticələndi. Cərimə zərbəsini Emin yerinə yetirdi ki, millidəki qollarının sayını 14-ə çatdıraraq Qurban Qurbanovun rekorduna şərik oldu. Dərhal hesabı dəyişmək istətəyən qazaxlar isə Orozovun qeyr-dəqiqliyinə üzüldü. Növbəti anlarda Musa, Ramil və Elvinin cəhdləri fayda vermədi. Ruhdan düşməyən millimiz tutarlı hücumlarının sayını artırdı ki, əzmkarlıq qələbə qolunu çox gözləməyimizə imkan vermədi. Kasım fərqlənmək üçün irəli atılan Ramili kobud müdaxiləylə yerə yıxdığından qapıdan bir qədər uzaqda cərimə zərbəsi təyin edildi. Burda bəxtini sınayan Toral birbaşa qapını nişan aldı və millimizi 73-cü dəqiqədə önə çıxardı. Artıq iş ya hesabı qorumaq, ya da növbəti qola imza atmaq idi. Yığmamız müdafiə olunmağa üstünlük verməklə uğurlu çıxışını sona qədər davam etdirdi. Beləliklə, Arif Əsədovun rəhbərliyi altında sonuncu dəfə meydana çıxan komanda tarixindəki 300-cü oyunu qələbə ilə bitirdi. 0:2 geridə olduğumuz oyunu çevirmək isə qələbəni daha da gözəlləşdirdi!

Gözdən qaçmadı
* Hər iki komanda AFFA-nın təşəbbüsüylə meydana Üzeyir Hacıbəyovun bəstəsi “Uvertüra”nın sədaları altında çıxdı.
* Qazaxların yeni baş məşqçisi Stanislav Çerçesov da oyunu izləyənlər arasında idi.
* Matçı barmaqla sayılacaq qədər azərbaycanlı və qazaxıstanlı azarkeş izlədi.

KƏNAN BAHADIR