Cümə günü start götürəcək Avropa çempionatı ərfəsində iştirakçı komandalarla bağlı bir sıra göstəricilər maraq doğurur. Məsələn, baş məşqçilərin nə qədər qazandıqları diqqəti cəlb edən deatallar sırasındadı.

"Football-plus.az" xəbər verir ki, bu məsələyə “Finance Football” nəşri aydınlıq gətirib. Beləliklə, qitə çempionatına komanda çıxaran məşqçilərin illik qazancı ilə bağlı maraqlı məqamlara göz gəzdirək.

* Bu planda Qaret Sautqeyt bütün həmkarlarını arxada qoyur. İngiltərə yığmasının çalışdırıcısı yerli futbol qurumundan ilə 5,8 milyon avro maaş alır. Qeyd edək ki, onun müqaviləsi sonuncu dəfə 2021-ci ildə yenilənib. Bu isə səbəbsiz deyil. Milli komanda koronavirus pandemiyası səbəbindən bir il gecikmə ilə baş tutan qitə çempionatında finala qədər irəliləmiş və son matçda penalti seriyası ilə İtaliyaya məğlub olmuşdu. Maraq üçün Sautqeytin əvvəlki müqaviləsinə görə 3,5 milyon avro məvacib aldığını da xatırladaq. Hazırkı sözləşməsinin müddəti isə 2024-cü ilin sonuna qədər nəzərdə tutulub.
Yeri gəlmişkən, Sautqeyt bu müddətin sonuna qədər postunda qalmaya bilər. Hər halda “The Independent” qəzeti bu ehtimalın baş tuta biləcəyini istisna etmir. Belə ki, onun “Mançester Yunayted”in maraq dairəsində olduğu vurğulanır. Xəbərdə klubun artıq bir neçə həftədi gözləmə mövqeyində olduğu bildirilir. Sautqeyt yığmadakı gələcəyini yalnız qitə çempionatından sonra müəyyən etmək istəyir. Ona görə ki, məlum söhbətin nəhəng turnir ərəfəsində komandanın diqqətini yayındıra biləcəyindən çəkinir. İndi MY rəhbərliyinin Erik ten Haqı istefaya göndərməyə nə üçün tələsmədiyi məlum olur. Bilindiyi kimi, komanda premyer-liqada mövsümü 8-ci yerdə başa vurub. İngiltərə kubokunu qazanan “qırmızı şeytanlar” gələn mövsüm Avropa Liqasında çıxış edəcəklər. Əlbəttə, belə nəticə fonunda Ten Haqın baş məşqçi vəzifəsində qalması böyük ölçüdə doğru olmaz. Amma dərd orasındadı ki, MY-nin başbilənləri artıq məlum səbəbdən hazırda 53 yaşlı Sautqeyt ilə danışıq aparmaq imkanına sahib deyillər. Onlar, yəqin ki, milli komandanın qitə çempionatında uğursuzluğa düçar olmasını arzulayırlar. Axı belədə0 Sautqeytin istefası qaçılmaz olacaq və MY dərhal onunla təmas quracaq.
* Ukraynalı Sergey Rebrov sonuncu qitə çempionatının yarımfinalında oynayan İspaniya yığmasının çalışdırıcısı Luis de la Fuente ilə eyni maaşı - 1,25 milyon avro alır. Maraqlıdı kı, sonuncu bir il əvvəl milli komandanı Millətlər Liqasında qələbəyə daşısa da, illik məvacibi o qədər də yüksək deyil. Halbuki qitənin digər aparıcı komandalarının baş məşqçiləri ilə azı 3 milyon avro qazanırlar. Görünür, İspaniya Kral Futbol Federasiyasının rəhbərliyi bu planda qənaət etməyi lazım bilib.
* Villi Sanyol seçmə turnirdə Gürcüstan yığması ilə ən böyük uğurun müəllifi olub. Amma onun illik məvacibi yalnız 200 min avroya bərabərdi. Fransalı qitə çempionatına komanda çıxaran ən az maaş alan mütəxəssisdi. Yeri gəlmişkən, milli komandanın sabiq müdafiəçisi, hazırda paytaxt Tbilisinin meri olan Kaxaber Kaladze bir neçə ay əvvəl baş məşqçinin aya 20 min avro qazandığını açıqlamışdı. Ona inansaq, Sanyolun illik əmək haqqısı 240 min avroya bərabərdi. Amma “Finance Football” nəşri bu məsələni diqqətlə araşdıraraq oxucularına dəqiq məlumat verib. Kaladze isə yığmanın baş məşqçisinin işə peşəkar yanaşdığını və “Pul Sanyol üçün heç vaxt ön planda olmayıb” fikrini də səsləndirib. Əlbəttə, Gürcüstan futbolunda dövran edən maliyyənin həcmini də nəzərə almaq lazımdı. Kim bilir, milli komanda qitə çempionatında az-çox uğurlu çıxış edərsə, Sanyolun məvacibi artırıla bilər.
* Diqəti cəlb edən bir göstərici də var. Portuqaliya yığmasını AÇ-2016-da qələbəyə daşıyan Fernando Santuşun illik məvacibi 2 milyon avrodan bir qədər çox idi. Komandanın hazırkı çalışdırıcısı Roberto Martines isə ondan təxminən iki dəfə çox qazanır. Onu da əlavə edək ki, sonuncunun Belçikadakı qazancı 1,2 milyon avro idi. İspaniyalı Martines komandasını dəyişməklə yaxşıca irəli düşüb.

AÇ-2024 iştirakçısı komandaların baş məşçilərinin illik maaşı
məşqçi komanda qazanc
1. Qaret Sautqeyt İngiltərə 5,8
2. Yulian Naqelsmann Almaniya 4,8
3. Roberto Martines Portuqaliya 4
4. Didye Deşam Fransa 3,8
5-6. Ronald Kuman Niderland 3
5-6. Luçano Spalletti İtaliya 3
7. Vinçentso Montella Türkiyə 1,8
8. Murat Yakın İsveçrə 1,6
9-11. Ralf Ranqnik Avstriya 1,5
9-11. Domeniko Tedesko Belçika 1,5
9-11. Zlatko Daliç Xorvatiya 1,5
12. Draqan Stoykoviç Serbiya 1,4
13-14. Luis de la Fuente İspaniya 1,25
13-14. Sergey Rebrov Ukrayna 1,25
15. Kasper Hyulmann Danimarka 1,15
16. Silvinyo Albaniya 0,75
17. Mixal Probej Polşa 0,56
18. Stiv Klark Şotlandiya 0,55
19. Françesko Kaltsona Slovakiya 0,54
20-21. Marko Rossi Macarıstan 0,30
20-21. Matyaj Kek Sloveniya 0,30
22. İvan Qaşek Çexiya 0,25
23. Edvard Yordanesku 0,24
24. Villi Sanyol Gürcüstan 0,20
Qeyd: məvacib milyon avro ilə göstərilib.