“Düşünürəm ki, istənilən mötəbər yarışdan sonra tədricən müxtəlif tendensiyalar ortaya çıxır. Hesab edirəm ki, bu Avropa çempionatı da istisna olmayacaq. Yəqin ki, dominant komandalardan kimlərsə final mərhələsinə çıxacaq. Final mərhələsi dedikdə, 1/4, yarımfinal və finalı nəzərdə tuturam. Favorit komandalarıma gəlincə, İspaniya, İtaliya, Fransa, Portuqaliyanı, elə çempionata evsahibliyi edən Almaniyanı, hələ də titul qazana bilməməsinə rəğmən, İngiltərəni deyə bilərəm. Bütün komandaları götürsək, məsələn, inanmıram ki, Xorvatiya millisi sürpriz etsin. Çünki onlarda nəsil dəyişikliyi gedir. Luka Modriç kimi oyunçusu olmasına baxmayaraq, ciddi bir irəliləyiş edə bilməyəcəklər. Fikrimcə, heyətində daha çox legioneri olan milli komandalar AÇ-2024-də favorit olacaqlar. Məsələn, Portuqaliya millisinin üzvləri bir sıra fərqli çempionatlarda, uğur qazanan komandaların heyətində çıxış edir. Daha sonra italyanlar, ingilislər də bu qəbildən olan komandalar sırasındadı. Aşağı-yuxarı favoritlərim bunlardı. Ancaq kimin çempion olacağı barədə indidən fikir bildirmək mümkün deyil. İstənilən halda belə uzunmüddətli yarışda zədələnmələr, bəxt amili çempionluğun taleyinə təsir edir. Öz millimizə gəlincə, bizi həmişə gürcülərlə müqayisə edirlər. İstər Gürcüstan millisi, istərsə də başqa milli komandalar olsun, bizim orta səviyyəli qrupdan çıxmaq şansımız çox aşağıdı. Hətta demək olar ki, yox səviyyəsindədi. Bu da məlum məsələdi. Hər bir qrupa reytinqi ən yüksək olan ölkələr düşür. Ən azı “top-5” millilərdən İngiltərə, İtaliya, Belçika düşür. Bizim isə həmin yığmalarla rəqabət aparmaq şansımız yoxdu. Hər dəfə gözümüzə Qazaxıstanla Gürcüstanı soxurlar. Ancaq hesab edirəm ki, heç həmin yığmaların belə normal qrupdan çıxmaq şansları yoxdu. Deyək ki, bir oyunda bəxtləri gətirər və hansısa matçda qələbə qazanarlar. Bizim üçün ən yaxın yol Millətlər Liqasıdı. Amma indiki oynayacağımız Millətlər Liqası bizim üçün həddindən artıq çətin olacaq. Çünki, İsveç və Slovakiya kimi millilər yenə bizə düşüblər. Fəqət yenə də istənilən halda növbəti AÇ şansımızı dəyərləndirsək, ora Millətlər Liqasından qatılmaq şansımız qat-qat çoxdu, nəinki seçmə turnir yolu ilə. Orda reytinqlər nisbətən aşağıdı. Məsələn, Gürcüstan millisiylə qarşılaşsaq, qələbə qazanıb qrupdan çıxmaq şansımız var. Hesab etmirəm ki, onlar bizdən çox güclüdü”.