“Barselona”nın problemi Xavi deyil, “Real”dı” - “Sevilya”nın baş məşqçisindən maraqlı açıqlama
Xəbər verdiyimiz kimi, “Barselona” Xavi Ernandesin rəhbərliyi altında keçirdiyi son oyunda “Sevilya”nı məğlub etdi.
Baş məşqçinin qovulacağı həmin oyundan bir neçə gün əvvəl bəlli idi. Hələ onda “Sevilya”nın baş məşqçisi Kike Sançes Flores “blauqrana”nı əfsanələrinə belə münasibətə görə tənqid etmişdi:
“Mən bunu deməli deyiləm… Ancaq “Barselona” əfsanələrinə necə də pis yanaşır. Bu, narahat edən tendensiyadı. Kuman, Messi, indi də Xavi ilə pis davranırlar. İstərdim ki, klublar əfsanələrinə yaxşı yanaşsınlar. Bu daha gözəl olardı. Bu varislik əlaqəsidi, məşqçilərlə fanatlar arasında əlaqələrin formalaşmasıdı. Əfsanələrə yaxşı münasibət çox önəmlidi”.
“Sevilya” – “Barselona” oyunundan sonra da Flores fikrini dəyişmədi:
“Xavini məşqçi kimi yüksək dəyərləndirirəm, La Liqadakı ötənilki çempionluğunu yüksək dəyərləndirirəm, hər biriniz kimi, mən də futbolçu Xaviyə heyranlıq duyurdum. Xavi düşündüyünü danışan, təmiz qəlbli oğlandı. O, keçid dövrünü yaşadı, bunu özünə də dedim. “Barselona”nın problemi var, ancaq bu, Xavi deyil, “Real”dı”.
Xatırladaq ki, “Barselona” yenicə başa çatan mövsümdə “Real”dan geri qalmaqla 2-ci yeri tutub. Xavinin komandası 85 xalla çempion olan “Real”dan 10 xal geri qalıb. 2022/23 mövsümünün sonunda isə “Real” çempion “Barselona”dan 10 xal geri qalmışdı. Onda madridlilərin hesabında 78 xal var idi. Xavi “Barselona”nı bütün turnirlər çərçivəsində 143 oyuna çıxarandan sonra istefaya göndərildi. Komandanın son mövsümdə heç bir titul qazanmadığını nəzərə alsaq, Xuan Laportanın qərarı da anlaşılandı.
Yeri gəlmişkən, komandanın 2-ci kapitanı Mark-Andre ter Ştegen belə hesab edir ki, bu cür uğursuz nəticələrdə futbolçuların da günahı var:
“Bizdə yaxşı oyunçular var, ancaq rəqabət aparmaq üçün daha çox çalışmalıyıq. Mən özüm də fərdi baxımdan mükəmməlləşməliyəm. Xavinin dincəlmək vaxtıdı. O, hər şeyin ən yaxşısını haqq edir, biz həmişə onun yanında olacağıq. Xavi bizə çox şey verib, biz də ona çox minnətdarıq. Xaviyə hər şeyin ən yaxşısını arzulayıram. O, uzun illər ərzində mənim dostum olub, ayrılmaq asan deyil”.
Bəlkə də Ter Ştegen haqlıdı. Son mövsümdə “Barsa”nı düşünülməmiş səhvlər – xüsusən də vacib oyunlarda – “dəfn edib”. Almaniyalı qapıçı isə bu mövsüm meydana çıxdığı 35 oyunda 37 top buraxıb.
Digər xəbərlər
