“Mənim üçün də qərar gözlənilməz oldu. Çünki cari mövsümdə son 4 tura qədər avrokuboklara vəsiqə şansımızı qorumuşduq. Növbəti “futbol ili” üçün daha yaxşı nəticə qazanacağımıza inanırdıq. Hətta üç həftə əvvəl yeni mövsümlə bağlı planları müzakirə etmiş, futbolçularla danışıq aparmışdıq. Müxtəlif iddialarla tanışam. İlk “dördlük” üçün daha çox büdcənin ayrılmasını tələb etməmişəm. Nə də “Neftçi”dən təklif almışam. Ümumiyyətlə, səbəblərlə bağlı rəhbərlikdən verilən məlumat “planlarımız dəyişdi” sözləridi. Əlavə heç nə deyilməyib. İşimə gəlincə, iki il ərzində komanda aşağı pillələrdə qərarlaşmadı. Komandaya premyer-liqanı tərk etmək qorxusu yaşatmadım. Klubla anlaşanda nə büdcədən xəbərim var idi, nə də hədəflərdən. Qısası, vaxtilə “Turan Tovuz”a görə əlimi “daşın altına qoydum”, kollektivin ən çətin zamanlarında işə başlayıb əlimdən gələni etdim. Fikrimcə, “Turan Tovuz”a yetərincə xeyrim dəyib. Yenə də incikliyim yoxdu. Qərarlara hörmətlə yanaşıram. Bundan sonrası? Hələ ki hansısa təklif yoxdu”.