Misli premyer-liqasında mövsüm başa çatdı.

Təbii ki, son turda bütün suallara aydınlıq gəldi. Ölkə çempionu “Qarabağ” Çempionlar Liqasına, “Zirə” Avropa Liqasına, “Sabah”la “Sumqayıt” isə Konfrans Liqasına qatılacaq. Ölkə futbolunun flaqmanı “Neftçi” isə bu il Avropaya gedə bilmədi. Bakılılar sonuncu dəfə belə uğursuzluğu 2016/17 mövsümündə yaşamışdı.

“Zirə” avrokuboklara vəsiqə qazanmaq ehtimalı yüksək olan komanda kimi gözləntiləri doğrultdu. “Qartallar” “Səbail” üzərində minimal hesablı qələbə ilə kifayətləndi. Mövsümün əvvəlindən bəri əsasən müdafiə futbolu oynadığına görə qınanan Rəşad Sadıqovun komandası üçün işin çətin tərəfi bundan sonra başlayır. Qəsəbə təmsilçisi Avropa Liqasında ölkəmizi təmsil edək. Artıq o arenada nəticə lazımdı. “Qaliblər mühakimə olunmur” deyilir. Elə indiki kimi Avropada da hansı tərzdə futbol oynamaqdan asılı olmayaraq, nəticə ön plana çıxacaq. “Səbail”ə gəlincə, Şahin Diniyevinm təbirincə desək, komanda qarşısına qoyulan ilk “altılığ”a düşmək hədəfinin öhdəsindən gələ bilmədi. Rəhbərliyin hansı addım atacağı isə artıq bu gün bilinəcək.

“Sumqayıt” da elitanı tərk etməsi dəqiqləşən “Qəbələ” üzərində qələbə qazanmaqla vəzifənin öhdəsindən gəldi. Böyük şəhəruin yeganə komandası özünü Konfrans Liqasında göstərməli olacaq. Bir neçə il öncə Avropa təcrübəsi görmüş “kimyaçılar” bu dəfə daha diqqətli mübarizə aparacaq. Ən əsası Samir Abasov “Neftçi” dönəmindəki uğursuz Avropa karyerasını indiki komandasıyla unutdurmağa çalışacaq. “Neftçi” doğma azarkeşlər önündə “Sabah”a məğlub olmaqla Avropa şansını itirdi. Bunun ardından isə klub Miodraq Bojoviçlə yolları ayırdı. Belədə bir mövsümdə iki baş məşqçi dəyişikliyi reallaşdı. Lakin yenə də istəklərinə nail olmadılar. Ümid edək ki, bu uğursuzluq komandanı silkələyəcək və bundan sonra daha diqqətli olmağa məcbur edəcək. “Sabah”a və onun rəhbərliyinə, sadəcə, alqış düşür. Komanda düzgün baş məşqçi seçimiylə daşları yerinə oturtdu. Krunoslav Renduliç şəxsi hədəfinin 2-ci yer olduğunu bildirsə də, 3-cü yerlə kifayətləndi. Buna baxmayaraq, komanda xorvatiyalı mütəxəssisin rəhbərliyi altında çıxdığı 11 oyunda 8 qələbə qazandı. Bu isə bizim çempionatın səviyyəsinə görə yetərincə uğurlu nəticədi.

Avrokuboklar uğrunda mübarizə nə qədər gərgin olsa da, Qərb derbisi də yaddan çıxmadı. Derbidə tovuzlular sevindi. Klubun idarə heyətinin sədri Ehtiram Quliyev oyunsonrası açıqlamasında növbəti mövsüm üçün hədəfin avrokuboklara vəsiqə qazanmaq olduğunu bildirdi, iddialı danışdı. Əslində Ayxan Abbasovun rəhbərliyindəki “Turan Tovuz” heç də pis təsir bağışlamır. Tovuzlular baxımlı oyun sərgiləməklə yanaşı, cari mövsümdə premyer-liqada “Qarabağ”dan sonra ən çox qol vuran komandadı. Sadəcə, təcrübə çatışmazlığı onları bu mövsüm iddialılar sırasından kənarda qoydu. “Kəpəz” də Adil Şükürovu komandaya cəlb etməklə doğrum addım atdı. “Sarı-göylər”in yeganə problemi sponsorsuzluqdu.

Mövsümün sonuncu matçında isə “Qarabağ” doğma “Azərsun Arena”da lakin qonaq qismində 11-ci çempionluğu qeyd etdi. Ölkəmizi Avropada layiqincə təmsil edən komandadan yenə gözləntilər böyükdü. “Araz-Naxçıvan”a gəlincə, komandanın sabahının necə olacağı bilinmir.

Misli premyer-liqası
4-cü dövrə, 36-cı tur
25 may
Zirə - Səbail 1:0
Sumqayıt – Qəbələ 1:0
Neftçi – Sabah 0:1
26 may
Turan Tovuz – Kəpəz 1:0
Araz-Naxçıvn – Qarabağ 2:2
1. Qarabağ 36 26 5 5 97-37 83
2. Zirə 36 16 10 10 33-22 58
3. Sabah 36 17 7 12 50-40 58
4. Sumqayıt 36 15 12 9 37-38 57
5. Neftçi 36 16 8 12 51-40 56
6. Turan Tovuz 36 13 9 14 53-53 48
7. Səbail 36 11 9 16 50-60 42
8. Araz-Naxçıvan 36 9 9 18 31-50 36
9. Kəpəz 36 9 8 19 39-67 35
10. Qəbələ 36 7 5 24 30-64 26
Bombardirlər: Olavio Juninyo (Qarabağ) – 20, Aleksandr Ramalinqom (Səbail) - 15.

KAMAL SƏFƏR