“Sabah” avrokuboklara vəsiqəni yalnız son turda təmin edə bildi.

Qış fasiləsindən bir qədər sonra rusiyalı mütəxəssis Murad Musayevin istefası 7-ci sırada olan komandanın gələcəyi barədə bədbin düşünməyə əsas verirdi. Amma Masazır təmsilçisi mövsümün sonunda belə düşünənləri səhv çıxarmağı bacardı. “Neftçi” ilə oyunda, həm də rəqibin sabiq futbolçusu Namik Ələskərovun yeganə qolu sayəsində. Bəli, Namik bu oyunun qəhrəmanı oldu.

Gerçəklik budu ki, “Sabah”ı ilk 20 oyuna Murad Musayev, son 11 oyuna isə Krunoslav Renduliç çıxardı. Xorvatiyalı mütəxəssisin “mən gələndə komanda 7-ci pillədə idi, söz verdim və bu gün avrokuboklara qatılanlardan biriyik” deməsini bəziləri Musayevin əməyinə kölgə salmaq kimi şərh etdi. Bəs rusiyalı mütəxəssis, hazırda “Krasnodar”ı çalışdıran Musayev bu məsələ ilə bağlı nə düşünür?

- Sabiq komandanız “Sabah” avrokuboklara vəsiqə qazandı, mövsümü 3-cü yerdə bitirdi. Komandadan kimləsə təbrikləşdizmi? Təəsüratlarınızı bilmək istərdim.
- Təbii ki, “Neftçi”- “Sabah” oyunu başa çatandan sonra rəhbərliyi əla nəticəyə görə təbrik etdim. Bu cür gənc klubun ardıcıl 2-ci mövsüm avrokuboklara vəsiqə qazanması, medalçılar sırasına düşməsi böyük uğurdu. Eyni zamanda klubun bir çox futbolçuları və işçiləri ilə söhbət etmişəm, qarşılıqlı şəkildə bir-birimizi təbrik etdik. Onlar məni “Krasnodar”ın 2-ci yeri tutması, mən də onları 3-cu yeri tutaraq avrokuboklara vəsiqə qazanmaları münasibətilə təbrik etdim. Sizin qəzet vasitəsilə “Sabah”ın bütün fanatlarını da təbrik edirəm. Bilirəm ki, həmişə komandanın yanındadılar, böyük dəstək verirlər. Onlar üçün də bu, mühüm hadisədi. Ona görə də bütün ''Sabah'' ailəsini təbrik edirəm.

- Ümumiyyətlə, son vaxtlarda komandanın çıxışını, eləcə dı “Neftçi” ilə oyununu necə qiymətləndirirsiz?
- “Sabah”ın oyunları ilə bağlı fikir söyləyə bilmərəm. Çünki son üç ayda başım öz işimə qarışmışdı. Təbii ki, oyunların icmalına baxırdım. Amma oyunlara tam baxmadan fikir bildirmək peşəkarlığa zidd hərəkət olar.

- Ötən il komandanın Avropada mərhələ keçməsinə səbəb ola biləcək penaltini Namik Ələsgərov boşa verdi. Hətta belə fikirlər var idi ki, mövsümün əvvəlində bu səbəbdən ona daha az şans verirsiz. Komandanı bu il avrokuboklara çıxaran həlledici qolu məhz Namik vurdu. Bu barədə nə deyə bilərsiz?
- Namik Ələsgərov heç vaxt məni məyus etməyib. Penalti qaçırmasına gəlincə, bu, hətta dahi futbolçuların da başına gələ bilir. Yəni bu baxımdan heç bir problem yoxdu. Biz qalib gələndə də, məğlub olanda da bunu komanda şəklində edirdik. Namikə həmişə güvənmişəm. Səviyyəsi həm futbolçu, həm də insan kimi yüksəkdi. Şadam ki, mövsümün həlledici məqamında, demək olar, “qızıl qol”u vurmaq məhz ona nəsib oldu.

- “Sabah”ın ötən il Kaşuk, Mikels kimi futbolçuları itirəndən sonra zəiflədiyi deyildi. Bəs indiki məqamda eyni sözləri demək olar?
- Bir qədər təxribatçı sualdı, mənə ünvanlamağınız doğru deyil. Amma eybi yoxdu, cavablayacam. Ötən mövsüm “Sabah”ın oyun keyfiyyəti çox yüksək səviyyədə idi. Komanda həm daha yuxarı yeri tutmuşdu, həm də daha çox xal toplamışdı. Amma mövsümlər bir-birindən fərqlənir. Ötən mövsüm mənim üçün bir məşqçi kimi nümunəvi alınmışdı. Komanda dəyişir, futbolçular ayrılır. Təbii ki, hər mövsüm fərqli məcrada keçir. Amma bu mövsüm də “Sabah” əla nəticə qazandı. Ona görə də belə müqayisələr yersizdi. Komanda bu mövsüm çox yaxşı işlər gördü.

- Sizin gedinişə üzülənlər, əməyinizin əvəzolunmaz olduğunu düşünüb klubu günahlandıranlar oldu. Bəs bu gediş Murad Musayevə, onun karyerasına necə təsir etdi?
- Məşqçilərin istefası və ya təyinatı futbolun ayrılmaz hissəsidi. “Sabah”da ümumilikdə 2 il 3 ay keçirdim. Həmin dönəmi həmişə çox xoş hisslər və sevgi ilə xatırlayıram. Məşqçi kimi orda böyüdüyümü deyə bilərəm. Orda özümə çoxlu yeni dost tapdım, yaxşı insanlarla qarşılaşdım. Ona görə də “Sabah” və Azərbaycan həmişə qəlbimdə xüsusi yerə malik olacaq.

- Kadi Borgesin “Qarabağ”a dönüşü müzakirə olunur. Bir baş məşqçi kimi Kadi və onun Azərbaycana mümkün dönüşü ilə bağlı nə deyə bilərsiz?
- Kadi mövzusunda danışmaq istəmirəm. Çünki əvvəlcə klubun rəsmi açıqlaması olmalıdı. Şayiə tipli mövzuları isə şərh etməyə hazır deyiləm.

RÖYANƏ OĞUZ