“Ümumilikdə sevindirici haldı ki, liqalarda canlanma baş verib, komandaların sayı artıb. 17-19 yaş arası futbolçular əvəzedicilər liqasında göz önündədi. Yəni klublar imkan daxilində bütün liqaları nəzarətdə saxlayır, perspektivli gənclərə də yol açılır. Bu proses daha da inkişaf edəcək, klubların sayı artırılacaq. Yeni rəhbərliyin bu haqda açıqlama verməsi də sevindirici haldı. Nə qədər liqaların sayı artırılsa, klubların baza-stadionlarının şəraiti yaxşılaşdırılsa, sponsorlar cəlb olunsa, ölkə futbolu adına çox yaxşı olar. Belədə komandalar, futbolçular arasında rəqabət də olacaq. “Qapazaltı” məsələsinə gəlincə, bu fikirlə razı deyiləm. Çünki “Araz-Naxçıvan” da 1-ci liqadan yüksəldi, ancaq heç də “qapazaltı” olmadı. Həm də 7 legioner oyunçu limitinin olması önəmlidi. Komandalar heyətinə legioner futbolçular cəlb edəcəksə, onda “qapazaltı” olmayacaqlar. Dövlətin ayırdığı vəsait və sponsorların cəlb edilməsi imkan verir ki, komandanı yaxşı komplektləşdirəsən, rəqabətədavamlılığı artırmaq üçün düzgün strategiya seçəsən. “Şamaxı”nın yüksək liqaya gəlməsində heç bir problem görmürəm. “Qarabağ”ı çıxmaq şərtiylə qalan komandalarımız aşağı-yuxarı eyni səviyyədədi. Həmçinin bu, 1-ci liqaya da aiddi. “Baku Sportinq” 1-ci liqaya çıxmağı bacardısa, burda daha da güclənəcək. 1 və 2-ci liqalar arasında elə bir ciddi fərq görmürəm. Sadəcə, 1-ci liqada legionerlərin olması komandalara müəyyən üstünlük qazandırır. Müşahidəmə görə getdikcə güclənən rəqabət fonunda bütün komandalar güclənəcək. Çünki rəqabət yenicə başlayıb. 2-ci liqanın yaradılması da onu göstərir ki, yüksək liqada özünə yer tapa bilməyən oyunçular bura cəlb ediləcək. Müəyyən qədər maaşları da yaxşılaşacaq. Düşünürəm ki, yeni rəhbərlik də sponsorların cəlb edilməsi yolunda önəmli addımlar atacaq. MOİK-lə “Qaradağ Lökbatan” kubokda rəqabət gücünü göstərdi. “Karvan” da, “İmişli” də legionerlərə üstünlük verir. Belədə isə komanda daha da güclənir. Kəsəsi, inkişaf etməkdə olan aşağı liqa klublarının daha “qapazaltı” olmayacağını düşünürəm. Lakin hələ ki onlar üçün ölkə kubokunu qazanmaq və ya finala, yarımfinala yüksəlmək tezdi”.

“Təbii ki, liqalar arasında fərqlərin olduğunu düşünürəm. Amma 2-ci liqadan 1-ci liqaya yüksələn komandanı, yəni “Baku Sportinq”i götürsək, arada elə də fərq olacağını düşünmürəm. Baş məşqçiləri Cavid Hüseynovu çox yaxından tanıdığım, məşqlərində iştirak etdiyim “Cəbrayıl”ı götürsək, məşq prosesi hətta premyer-liqaya yüksələ biləcək səviyyədədi. İndiki infrastrukturları, imkanları icazə verir ki, komanda 1-ci liqada mübarizə aparsın. Yəni aşağı liqalardakı komandaların keçidlərinin çox da çətin olmayacağını və bunun öhdəsindən gələ biləcəklərini düşünürəm. Ən çətin məqam isə 1-ci liqadan premyer-liqaya keçiddi. Çünki burda həm heyət, həm də maliyyə aşkar şəkildə fərqlənir. Kuboka gəlincə, yalnız İngiltərədə ola bilər ki, hansısa aşağı dəstə təmsilçisi yarımfinal və ya finala çıxsın. Bizdə fərqli liqaların klubları arasında maliyyə uçurumu var. Bu üzdən də nisbətən çətin olacaq. Yəni indiki durumda “Şamaxı” üçün əlindəki heyətlə premyer-liqada mübarizə aparmaq çox çətindi. Məcburdular ki, heyətlərinin 70 faizini gücləndirsinlər. Bu da daha çox maddi durumla bağlıdı. İnfrastruktur baxımından şəraitləri normaldı, premyer-liqa təcrübələri də var. Məncə, aşağı yaş qruplarını da təşkil edə bilərlər. Ancaq maliyyə baxımından götürsək, fikrimcə, bir klub üçün ayrılan illik 3 milyon manat yetərli deyil. Yalnız bu məbləğ olacaqsa, həddən artıq çətinliklərlə üzləşəcəklər. Ən azı rəqabətədayanıqlı olmaq üçün 5 milyon manat da əlavə büdcəyə ehtiyac var. Təbii ki, bu ortalama hesablamalardı. Kəsəsi, bizdə ən çətini 1-ci liqadan premyer-liqaya keçiddi. Elə götürək “Şamaxı”nı. Komandanın 1-ci liqada oynayan heyətinin 70 faizi kənarda qalacaq. Əziyyət çəkən oyunçular premyer-liqaya yüksələndən sonra “Şamaxı”ya lazım olmayacaq. Ona görə də belə halların yaşanmaması üçün premyer-liqaya yüksələ biləcək aşağı liqa klublarının maliyyəsi aşağı-yuxarı elita səviyyəsində olmalıdı. Bura həmçinin komandanın heyətindəki oyunçular da daxildi. Yəni premyer-liqaya çıxmaq istəyirsənsə, yaxşı fuitbolçuları cəlb edib, bunu təməlini qoymaq məcburiyyətindəsən. Məsələn, “Şamaxı”da premyer-liqada oynaya biləcək səviyyədə Emin Zamanov kimi 3-4 futbolçusu var. Həmin oyunçular komandada qalacaq. Lakin qalan 70 faizlə yolları ayırmalı olacaqlar ki, bu da düz gəlmir”.