“Şamaxı” “Araz Saatlı” üzərində qələbə qazanmaqla premyer-liqaya vəsiqə qazandı.

Saatlı təmsilçisi isə 1-ci liqada sonuncu pillənin sahibi olaraq, növbəti mövsümdən etibarən 2-ci liqada çıxış edəcək. Məğlubiyyətdən sonra klubun prezidenti Ədalət Abdullayev “Futbol+”in suallarını cavabladı.

O, əvvəlcə ümumi durum barədə danışdı:

- “İrəvan”la bağlı hadisələrdən xəbərdarsız. Sizcə, ədalətli olan onların aşağı elitaya düşməsi, sizin isə pley-off oynamağınızdı?
- Təbii ki. Federasiyanın sərt üzünü göstərməli olduğunu düşünürəm. Belə etməlidilər ki, başqalarına da dərs olsun. Yalnız “İrəvan”da yox, başqa klublarda da belə neqativ hallar var. Bunun qarşısını mütləq almalıyıq. İnkişaf istəyiriksə, qolumuzu çırmalayıb, əlimizi daşın altına qoymuşuqsa, belə şeylərə sərt reaksiya verməliyik.

- Mövsümün əvvəlindən məni ən çox sevindən hadisə Ülvi Əvəzov (15 yaş) və Hazar Əmirov (17 yaş) kimi uşaqların əsas komandaya cəlb olunmasıdı. Bu, klubun strategiyasıdı, yoxsa oyunçu qıtlığından qaynaqlanır?
- 1-ci liqada yeganə klubuq ki, 6 yaş qrupunda komandamız var. Düzdü, bunun 5-ci AFFA maliyyə hesabına başa gəlib. Amma onlar da bizim balansımızda oynayır. Bu il əlavə xərcə gedərək, U-15-i yaratdıq. Nəticə önəmli deyil. Uğurlu olmasa da, əsas odu ki, həmin uşaqlar 14 yaşından sonra itməsinlər. Bilirik ki, həmin yaşda uşaqlar Qəbələdə və ya başqa şəhərlərdə ailəsindən uzaq qala bilmir. Planımızda var ki, 1-ci liqada qalsaq, gələn mövsüm U-17 də yaradaq. Yarada bilməsək də, həmin yaş qrupundan 3-4 futbolçu var ki, onlarla müqavilə bağlamağa çalışacağıq. Şərt deyil ki, əsas heyətdə oynasınlar. Önəmli olan həmin oyunçuların əsas komanda ilə məşqlər etməsi, daha da təkmilləşməsidi. Ülvi Əvəzov kimi. O, çox ağıllı futbolçudu. Yaxın illərdə bunu bütün futbol camiəsi görəcək. Yəni etdiyimiz klubun strategiyasıdı, oyunçu qıtlığından qaynaqlanmır. Saatlı kütləvilik baxımından futbol regionudu. Bilirsiz ki, bizim rayonda Axıska türkləri də yaşayır. Daha öncə futbol ənənələrimiz olmayıb deyə, rayonda cəmi iki kateqoriyalı məşqçi vardı. Bunların sayını artırmalıyıq. Axıska türklərinin yaşadığı kənddən mərkəzə 50 km məsafə var. Onları nəqliyyatla təmin edə bilmiriksə, ən azı həmin əraziyə məşqçi göndərməliyik. Bunların üzərində çalışırıq. Həmçinin bazamızda işlər gedir. Gələn mövsümdən təbii məşq meydançası da xidmətimizdə olacaq. Çalışacağıq ki, aşağı yaş qruplarının da məşqlərini orda təmin edək. Planlarımız böyükdü.

- Gözlədiyiniz baş verməsə, komanda 2-ci liqaya yuvarlansa, yenə də planlarınız yerində qalacaq?
- Təbii ki. Eyni strategiya ilə davam edəcəyik. Düzdü, maliyyə baxımından eyni komanda ilə çıxış edə bilməyəcəyik. Daha çox yerli futbolçuları heyətimizə cəlb edəcəyik. Amma klubun dağılması kimi hadisənin yaşanması baş verməyəcək. Bir neçə aydı bu sual həm mənə, həm də Səbuhi Səfiyarlıya verilir. Lakin biz Azərbaycan futbolundakı mifi dağıdacağıq. Belə düşüncələrdən uzaqlaşmaq, futbolu inkişaf etdirmək lazımdı.

İSMAYIL