Oyundan sonra “Şamaxı”nın baş məşqçisi Ramiz Məmmədov jurnalistlərin önünə çıxdı:

- Qaliblər mühakimə olunmur. Lakin qonaqların qolundan sonra sanki komandanızda psixoloji təzyiq yarandı...
- Komandada arxayınlıq var idi ki, bu matçda qələbə qazanacağıq. 1:0 da olsa, 3:1 də olsa, qələbə əldə etməliydik. Buna inanırdıq.

- Baş məşqçi kimi yenidən premyer-liqaya qayıdırsız. Təəssüratınız necədi?
- Mənim üçün bir o qədər də fərqi yoxdu. Bilirsiz ki, yetərincə təcrübəmiz var. “Şamaxı”nın premyer-liqadan düşüb, yenidən elitaya qalxması mənim üçün daha önəmli idı. Futbolsevərlərin xoşbəxt olması mənim üçün daha vacib idi.

- “Qəbələ”nin qurucularından biri olmusuz. Hazırda da “Şamaxı” elə məhz “Qəbələ”ni əvəzləyəcək. Bu haqda düşüncələriniz maraqlıdı...
- “Qəbələ” həm sevimli klublarımızdan biridi, həm də sevdiyimiz şəhərlərdəndi. İnanıram ki, onlar da bizim kimi yenidən elitaya yüksələcək. Komandaya uğurlar arzulayıram.

- Fasilədə “Mingəçevir” - “Qaradağ Lökbatan” matçının hesabına nəzər yetirdizmi?
- Tam səmimi deyəcəm. Bunu bütün klub işçiləri təsdiqləyər ki, heç bir rəqibin matçını izləməmişəm. Bunun mənim üçün önəmi yoxdu. Mənə yalnız öz komandamın çıxışı maraqlıdı.

- “Şamaxı”nın yerli futbolçularla oynamaq prinsipinə hamımız bələdik. Premyer-liqada hədəf yenə eyni olacaq?
- İlk gündən klub rəhbərliyinin strategiyası azərbaycanlı futbolçuların inkişafı olub. Bu haqda yenə də düşünəcəyik. Rəhbərliklə yenidən danışıqlar aparacağıq. Məlumat olan kimi sizinlə bölüşəcəyik.

- 1-ci liqada elə bir futbolçu var ki, özünüzlə premyer-liqaya aparmağı planlaşdırırsız? “Şamaxı” xaric...
- Çoxdu elə futbolçu. Ad çəkməyə ehtiyac yoxdu. Hər birini baxışa çağıracağıq.

- Sizin aqibətiniz necə olacaq? Komandada qalacaqsız, yoxsa başqaları kimi aşağı liqada əziyyət çəkib, premyer-liqada “Şamaxı”nı tərk etməli olacaqsız?
- Sağlıq olsun. Yaşayıb görəcəyik. Bütün fikirlərə hörmətlə yanaşıram. Əsas odu ki, “Şamaxı” premyer-liqada olsun. Qalan şeyləri görəcəyik.

İSMAYIL