FİFA Şahruddinin komandasına cəza verdi - Murat Sancak nədən gileyləndi?
Ciddi maliyyə problemləri yaşayan və bu üzdən zəif mövsüm keçirən “Adana Dəmirspor”la bağlı yeni xəbərlər var.
“Football-plus.az” xəbər verir ki, bu komanda ötən mövsümü 4-cü pillədə başa vuraraq tarixində ilk dəfə avrokuboklarda iştirak etmişdi. Bu mövsüm isə adanalılar sona iki tur qalmış 11-ci pillədə qərarlaşıb. Şahruddin Məhəmmədəliyevin şərəfini qoruduğu komanda son turda öz meydanında elitada qalmaq üçün oynayan “Qaziantep”dən 6 top buraxdı! Əslində komanda mövsümün əvvəlində bütün gücünü Konfrans Liqasının qrup mərhələsinə vəsiqə qazanmağa yönəltmişdi. Amma adanalılar təsnifatın pley-offunda penalti seriyasında “Genk”ə uduzdular. Bundan sonra isə yavaş-yavaş problemlər baş qaldırmağa başladı. Bir-bir bütün əsas oyunçular, eləcə də baş məşqçi Patrik Klyuvert ilə yollar ayrıldı. Bu prosesin son halqası kimi bugünlərdə Luiş Naninin da müqaviləsi ləğv olundu. Zatən portuqaliyalı ulduzun klubla müqaviləsinin müddəti mövsümün sonunda başa çatırdı. Srağagün FİFA-dan “Adana Dəmirspor”a pis xəbər gəldi. Belə ki, mövsümün ortasında qovulan Klyuvertin təzminat ödənilmədiyindən komandaya 3 dönəm üçün transfer cəzası verildib. 47 yaşlı niderlandlı mütəxəssisin təzminatı 142 min avrodu. Amma bu borc ödənilərsə, cəza dərhal aradan götürüləcək.
Klyuvert istefaya göndəriləndən bəri komandanı təcrübəli Hikmət Karaman çalışdırır. Prezident vəzifəsini isə Murat Sancakın sağ əli sayılan Mətin Korkmaz icra edir. Sancak bir neçə ay öncə istefa vermişdi. Amma aydın məsələdi ki, hələ də klubda hər şeyə məhz o nəzarət edir. Son hadisələrin ardından 56 yaşlı Sancak susqunluğunu pozaraq önəmli açıqlamalar verib:
“Fanatlar düşünməsin ki, son matçdakı nəticə bizi üzmür. Həmin oyundan sonra Karaman yanıma gələrək istefa verdi. Elə Mətin Korkmaz da davam etmək istəmədiyini söylədi. Karamanın istefasını qəbul etmədik. İşlədiyi dönəmdə klub üçün çox fədakarlıq edib. İndidən əminliklə deyə bilərəm ki, müqaviləsini birilliyə yeniləyəcəyik. Mən bu günə qədər ailəmdən, işimdən, pulumdan çox fədakarlıqlar etdim. Bu kluba qoyduğum paranı hesablasam, Adanadakı bütün iş adamlarının xərclədiyi puldan daha çox edər. Amma bir qəpik də olsun, bizə dəstək verən yoxdu. Bölgə İdman Müdirliyi stadionun icarə haqqı kimi “Samsunspor” və “Sivasspor”dan 1 milyon lirə tələb etdiyi halda, bizdən 14 milyon lirə alır. Bu, hansı məntiqə sığır? Cəmi bir oyuna görə təhlükəsizlik şirkətinə 400 min lirə ödəyirik. Amma məsələn, son ev oyununda VİP-lojanı saymasaq, bilet gəlirlərimiz cəmi 200 min lirə təşkil etdi. Sizcə, aradakı fərqi kim ödəyir? Açıq şəkildə söyləyirəm ki, bu yükün altına girməyə, borcları ödməyə razı olan biri varsa, mən geri çəkilməyə hazıram. Amma bilirəm ki, heç kim ortaya çıxmayacaq. Biz bu qədər fədakarlıqlar etdiyimiz halda, hələ üstəlik oyun satmaqda günahlandırılırıq. Mənim gözümdə oyunu satan insan anasını və bacısını da satar! Tənqidin də bir çərçivəsi olmalıdı. 2021-də bizimlə birlikdə elitaya yüksələn “Girəsunspor” gələn mövsüm 3-cü divizionda oynayacaq. “Altay” da eyni şəkildə. “Bursaspor” isə hətta 4-cü diviziona düşüb. Amma biz hələ də elitadayıq. Fanatlardan yeganə istəyim budu ki, bu komandaya sahib çıxsınlar. Tranfer cəzası aldığımız üçün bu yay heç kimi almayacağıq. Bu qədər ağır tənqidlərdən sonra, ümumiyyətlə, borcu ödəyib cəzanı aradan qaldırmayacağıq. Bəzi futbolçularla yollarımızı ayıracağıq. Rəhbərlik bizik və qərarımızı vermişik. Transfer etməyəcəyik”.
