“Qızım Türkiyədə turizm üzrə magistratura təhsili alıb. Buna görə də bu sahə ilə məşğuldu. Mən də buna görə ona kömək edirəm ki, ölkəmizdə ixtisası üzrə fəaliyyət göstərsin. Özümüz bir müddət olar ki, obyekt qurmuşduq. Gördüm ki, “Araz Saatlı” çətin vəziyyətdədi, imkanları zəifdi. Əvvəlcə klub rəhbərliyi mənə müraciət etdi ki, imkan varsa, oteldə yerləşək. Sahəmiz geniş olduğundan stadion, kottec yaratmaq istəiklərini mənə çatdırdılar. Razılaşıb, o şəraiti təşkil etdim. Hazırda işlər davam etsə belə, oteldə yerləşmələrini təklif etdim. Burda hər şey yüksək səviyyədədi. Təşəbbüsü mən göstərdim, onlar da bəyəndi. Baxdım ki, öz rayonumdu, dəstək olmalıyam. Əfsus ki, hələ üz ağartmırlar. Yəqin ki, bizim belə əməlimizin qarşılığında AFFA da ədalətli qərar verər”.

“Düzdü, “Araz Saatlı” dünənki oyunda (MOİK-lə mayın 9-da keçirilən oyunu nəzərdə tutur – red.) zəif təsir bağışladı. Söz verirlər ki, hər şeyi düzəldəcəklər. Öz borcumu yerinə yetirmişəm. Həmçinin burda oyunçuların ailə üzvləri ilə yaşaması üçün kotteclər inşa etdirəcəyik. O da yayın sonuna qədər istifadəyə veriləcək. Hər biri üçün ikinəfərlik otaqlar, lazım olan nə varsa, yüksək səviyyədə qurulub. İşlər də davam etdirilir. Stadion məsələsinə gəlincə, 3-4 aya hazırlayıb təhvil verəcəm. Oteldə yox, özlərinin ayrıca qalmaq, məşq etmək üçün bütün imkanları olacaq. Çalışsınlar ki, 2-ci liqaya düşməsinlər. Hər bir iş adamı qarşılığında nəticə gözləyir. Bilirəm ki, vəziyyət yaxşı deyil. Komanda 2-ci liqaya düşsə belə, yardım kampaniyasını davam etdirəcəm. Amma onların da bir fərasəti olmalıdı. Hansı liqa olur-olsun, öhdəliyimi yerinə yetirəcəm. Əslində futbola uzaq adamam. Lakin rayonumun klubunun belə vəziyyətə düşməsi mənə ağır gəldi. İmkanım nəyə çatırsa, o köməyi sona qədər edəcəm. İstərdim ki, ətraf rayonlarda da belə təşəbbüs olsun. Yəqin ki, çətin vəziyyətdə qalan bölgə klublarına da rayonun imkanlı şəxsləri dəstək göstərə bilər. Buna da kimisə məcbur etdirmək olmaz, ürəkdən gələn əməldi. Saatlı vətəndaşı kimi istəyərəm komandamız yuxarı pillələr uğrunda mübarizə aparsın. Ancaq dünənki oyuna baxdım, görürəm ki, 2-ci liqaya düşməyə yaxınıq. Buna görə məyus oluram. Çox istərdim ki, yardım etdiyim klub ən yüksək liqada olsun. İndiki halda, heç olmasa, 1-ci liqada qalsın. Nə olsa da, geri dönməyəcəm. Dünən futbolçularla görüşdüm, 5:0 uduzmaq nə deməkdi?! Bacarmırsansa, burda niyə varsan?! Hamısıyla danışdım. Rəhbərliklə məsləhətləşmələr olur. Futboldan uzaq olduğuma görə yalnız bəzi müzakirələrdə fikir söyləyə bilirəm. Rəhbərlikdən heç bir narazılığım yoxdu. Sadəcə, komanda üzvləri çox zəifdi. İndiyə qədər heyəti hardan yığıblar, klubu necə qurublar - bilmirəm. Hər bir halda mövsümün bitməsini gözləmək lazımdı”.