1-ci liqada çempionluq uğrunda amansız mübarizə davam edir.

Nisbətən aşağı səviyyəli çempionatı mövsümün əvvəlindən bəri maraqlı edən də məhz bu məqam idi. Komandalar arasında ciddi rəqabətin olması dəfələrlə belə fikirlərin səslənməsinə səbəb olub: “1-ci liqa daha baxımlıdı”. Mən də bu sözlərlə razıyam. Birincisi, burda daha çox yerli futbolçunun inkişafı üçün şərait var. Yox, infrastruktur baxımından demirəm! Məhz gərgin mübarizə şəraitinə və futbolun bölgələrdə təbliğinə görə 1-ci liqanın varlığı alqışalayiq haldı. Əlbəttə, burda xeyli çatışmazlıq var. Amma zamanla düzələcəyinə ümid edirik. Hər halda, müəyyən vaxta ehtiyac duyulur. İstər stadionların müasir standartlara cavab verəcək hala gətirilməsi, istər maliyyə problemlərinin aradan qaldırılması üçün addımların atılması, istərsə də yuxarı pillələr, xüsusilə çempion uğrunda mübarizənin aparılması vacib məsələlərdi. Sadaladıqlarım məhz klubların öhdəliyidi ki, bir neçəsi cari mövsümdə bunu qismən etməyə çalışdı. Həmçinin də “İmişli”...

RDC MMC-nin sponsorluq etdiyi bölgə təmsilçisinin ciddi maliyyə sıxıntısı yoxdu. Komanda gənc azərbaycanlı futbolçulardan və üç legionerdən qurulub. Orta yaşı 25 olan kollektiv mövsüm ərzində uğurlu çıxışla rəqiblərini məyus etməyi bacarmışdı. İş o yerə çatmışdı ki, lider “Qaradağ Lökbatan”ı məğlub etsəydilər, çempionluğa doğru iri addım atacaqdılar. Son iki rəqib – “Araz Saatlı” və MOİK-i məğlub etmək isə nisbətən daha asan iş idi. Klub rəhbərliyi də bunun fərqində idi ki, matçdan əvvəl çal-çağırlı konsert təşkil edildi. 3800 azarkeşin izlədiyi oyun “yağ kimi” irəliləyirdi. Qarşılıqlı hücumlar, ciddi rəqabət, qol axtarışı, azarkeşlərin yaratdığı atmosfer....

Qısası, ölkə futbolunda alışmadığımız səhnələrə şahidlik edirdik. Təəssüf ki, baş hakim İnqilab Məmmədovun 41-ci dəqiqədəki qərəzli, yaxud yanlış qərarı “arxı qurutdu”. “İmişli”nin futbolçusu Ruslan Hacıyev hesabı aça bilsə də, ədalət təmsilçisi (!) qolu qeydə almadı. Səbəb? Güya futbolçu topu qbul edərkən əllə toxunub. Reallıq isə başqadı. Nə top ələ deyib, nə də başqa qayda pozuntusu var! Bunu anlamaq üçün həmin epizodu diqqətlə izləmək kifayətdi. Baxmayaraq ki, özünü azarkeşlərin qəzəbindən qorumaq üçün meydanı tərk edən İnqilab bəyin bunun üçün 10 dəqiqə vaxtı var idi! Etmədi, əvəzində “İmişli”nin bir mövsümlük əziyyətini yerə vurdu. Hə, bəlkə də qol sayılsa da, qalib “Qaradağ Lökbatan” olardı. Amma futbolun belə halları ehtimalların üzərində qurulmayıb. Nəticəyə tablodakı rəqəmlər qərar verir.

Ümumiyyətlə, İnqilab Məmmədov “İmişli”nin taleyi ilə oynadı. Əsgər Abdullayevin komandasını premyer-liqaya həsrət qoydu. İndi gözə batan kollektivin əvvəlki matçlarda itirdiyi xallar deyil, məhz baş hakimin səhvidi! Hər halda, şans var idi. Bunu heç kim dana bilməz.

Yeni AFFA rəhbərliyinin artıq 1 aydan çoxdu vəzifə başında olduğunu bilirik. Biz də islahatdan, təcrübəli hakimlərin sayının artırılmasından danışır, FİFA referisi İnqilab Məmmədovun təmsil etdiyi hakimlik sahəsində tezliklə inqilabın baş verməsini arzulayırıq. Görünür, “İmişli”nin puç olan premyer-liqa xəyalları kimi, bizim də bu yöndə xəyallarımız puç olmaqdadı. Belə də inqilab olar?!

KƏNAN BAHADIR