"Biz də istəyərik ki, çempionatımız gərgin və inkişaflı olsun. Üç komandanın – “Qarabağ”, “Neftçi” və “Sabah”ın çempionluq uğrunda mübarizəsinə gəlincə, bu yenilik deyil. Zatən mövsümün starından 3-cü dövrəyə qədər elə üç komanda çempionluq uğrunda döyüşür. Eləcə də avrokuboklara vəsiqə uğrunda 4-5 komanda mübarizə aparır. Amma bu, çempionatımızın inkişafı və kreativliyi demək deyil. Əlbəttə, yaxşı olardı ki, premyer-liqada daha çox klub çıxış etsin. İstər çempionluq, istər avrokuboklara vəsiqə, istərəsə də elitada qalmaq uğrunda son ana qədər gərgin mübarizə getsin. Belə durum mili komandamızın da inkişafı deməkdi. Amma reallıq odu ki, bu həftə start götürəcək çempionatz ötən mövsüm ilə aşağı-yuxarı eyni səviyyədə olacaq. Bütün komandalara uğurlar arzulayıram".

"Ümumiyyətlə, bu düşüncə hardan çıxıb, necə götürülüb ki, bu mövsüm ölkə çempionatının ən yaxşı və güclü mövsümü olacaq? Belə iddiada olanlar ortaya ciddi fakt, dəlil qoymalıdı. "Neftçi"nin çempionluq uğrunda mübarizə aparması dünya futbolunda sürpriz olardı. Yəni "ağ-qaralar"ın möcüzə edəcəyinə inanmıram. "Sabah" ötən mövsümdə olduğu kimi, yenə də “dişini göstərəcək”. Ötən illərlə müqayisə aparıb məsələyə real yanaşsaq, onsuz da ölkə çempionatında iki-üç komanda çempionluq uğrunda döyüşür, yerdə qalanların az qala hamısı qarşısına avrokuboklara vəsiqə hədəfi qoyur. Amma mövsümün gedişində elitada qalmaq uğrunda çarpışırlar. Bundan başqa, hansısa klub 7-8 transfer edib deyə, bu məqam onun iddialı olacağı anlamına gəlmir. Çünki transferlərin hələ çempionatımıza necə uyğunlaşacağı, özlərini necə göstərəcəyi bəlli deyil. Eləcə də həminki stadionlar, hakimlər, komandalar, yayın və başqa eyni qalan məsələlərdi. Heç bir dəyişiklik yoxdu.

Qeyd etdiklərim daha çox premyer-liqanın inkişafını təmin edən cəhətlərdi. Bu cəhətlərdə isə inkişaf görünmür. Biz rəqabət ilə səviyyənin fərqini ayırd edə bilmirik. Baxın, iki zəif rəqibin də bir-biriylə savaşması rəqabətdi. Amma bu onların dünya çempionatına vəsiqə qazanacaqları və ya orda çıxış edəcəkləri anlamına gəlmir. Ötən mövsümə nəzər yetirək, "Sabah" son turlara qədər "Qarabağ"la çempionluq mübarizəsindən əl çəkmədi. "Neftçi"nin bürünc medallar uğrunda rəqibi olmadı. "Qəbələ" ilə "Zirə" arasında sona qədər gərgin mübarizə getdi. Həmçinin ikinci "5-lik" təmsilçiləri arasınsa 4 komanda elitada yerini qorumaq üçün sona kimi çarpışdı. Sözüm o ki, onsuz da çempionatımız rəqabətlidi. Bu mövsüm də oxşar çempionat olacaq. Amma rəqabətin olması heç də səviyyənin artması deyil".

"Yeni mövsümün əvvəlkilərlə müqayisədə üstün və güclü çempionat olacağını düşünmürəm. Mənə görə premyer-liqamızın ən güclü, səviyyəli, yaxşı vaxtlları 6-lıq sisteminin mövcud olduğu dövr idi. Həmin vaxtlarda "Neftçi", "Xəzər Lənkəran", "İnter", "Bakı", "Karvan", "Qarabağ" kimi komandalar çempionluq uğrunda çarpışırdı. Hazırda əksər klublarımızın 3-5 milyonluq büdcəsi var. Bu da böyük hədəfləri fəth etməyə imkan vermir. Odu ki, yeni “futbol ili”ndə də 2-3 komanda çempionluq, 3-4 təmsilçimiz avrokuboklara vəsiqə, yerdə qalanlar da maksimum irəli getmək və elitada yerini qorumaq üçün mübarizə aparacaq. Yəni rəqabətli çempionat izləyəcəyik, amma ən yaxşı və ən güclü mövsüm olmayacaq".