"Kəpəz"in "Neftçi" və "Zirə"yə qarşı oyunlarının ssenarisi "Sumqayıt"la matçda yazıldı" - "Xəmsə"dən şok açıqlama
Elitada qalmağı təmin edən "Kəpəz" dünən “Neftçi" ilə oyunda acınacaqlı məğlubiyyətlə üzləşdi - 1:5. Əzəli rəqibin meydanından "əli ətəyindən uzun qayıdan” komanda yerində saydı. Gəncəli azarkeşlər isə matçboyu, demək olar ki, fasilə vermədən komandanı dəstəklədi.
Görəsən, onlar ağır məğlubiyyəti necə qarşılayır? Nəticəyə görə kimi günahlar bilirlər?
Bu suallarla "Xəmsə" fanklubunun İdarə Heyətinin üzvü Müşfiq Məmmədova müraciət etdik. Onun "football-plus.az"a söylədikləri:
"Əlbəttə, əzəli rəqibə belə hesabla uduzmaq yaxşı hal deyil və heç kimi qane edə bilməz. Təəssüf ki, itkilərin çoxluğu və 1-ci hissənin sonunda hesabda öndə olduğumuz halda, ardıcıl iki qol buraxmaq nəticəyə təsir etdi. Günahkar axtarmağın məntiqi yoxdu. Sadəcə, komanda tez ruhdan düşdü. Həmçinin başqa məqamlar da var. Məsələn, "Neftçi"nin ilk qolunu vurduğu epizodda top Eddinin əlinə dəydi. "Kəpəz"in qapısı arxasında oturduğum üçün bunun canlı şahidi oldum. Hətta top ələ toxunarkən çıxardığı səsi də eşitdim. Lakin hakim oyunu dayandırmadı və epizod qolla nəticələndi".
Müşfiq bəy "sarı-göylər"in əsas futbolçularının cəzalandırılmasının səbəblərinə də toxundu: "Kəpəz"in "Neftçi" və "Zirə"yə qarşı oyunlarının ssenarisi "Sumqayıt"la matçda yazıldı. Hakimlər əsas oyunçularımızı "zərərsizləşdirdi". Həmin səhnələr komediyadan başqa bir şey deyildi".
KƏNAN BAHADIR
Digər xəbərlər
