“Oyunun mahiyyəti və əhəmiyyəti bizim üçün aydın idi. Bunu həftəboyu keçirilən məşqlərdə də bütün futbolçulara aşılamağa çalışdıq. Oyna baxanlar olubsa, yəqin ki, mənə haqq qazandırar. Ümumiyyətlə, bütün komponentlərdə üstün tərəf biz idik. Dəfələrlə qol imkanı yaratsaq da, sadəcə, dəyərləndirə bilmədik. Rəqibin bir-iki hücumu oldu. Həmin hücumlardan biri də fərdi səhvimiz ucbatından qolla nəticələndi. Mövsüm ərzində məğlub olduğumuz oyunlara, itirdiyimiz xallara baxsaq, 90 faizi futbolçuların fərdi səhvindən olub. Nə qədər bu problemi düzəltməyə çalışsaq da, keyfiyyət və təcrübə baxımından mümkün olmur. Ancaq oyun sistemində, planında üstün olduğumuzu hər kəs bilir və bu haqda da mənə deyiblər. Amma təəssüf ki, yaxşı oynamağa xal düşmür. Önəmli olan qələbə qazanmaqdı və nəticədi. Turnir cədvəlində gərgin mübarizə gedir. “Baku Sportinq” bizdən 3 xal öndə idi. Məğlub olacağımız halda 2-ci yer də təhlükə altına düşürdü. Ələ düşən şansları, əsasən də dörd yüzfaizlik qol epizodunu qaçırdığımıza görə cəzalandıq. İndiki durumda yalnız rəqiblərin xal itirməsini gözləyib, növbəti turların hamısında qələbə qazanmalıyıq”.

“Baxımlı oyun alındı. Üstün tərəf də biz idik. Sadəcə, onların oyunçuları daha təcrübəlidi. Epizodlardan da maksimum şəkildə yararlandılar. Hələ ki pley-off şansımız var. Təbii ki, məğlub olmuşuqsa, deməli, hazırlıqda müəyyən axsaqlıqlar olub. Amma ümumilikdə baxımlı oyun alındı”.