Luçesku Kiyevə gəldi, söz-söhbət başladı
Rusiya Ukrayna ərazisini işğal etmək üçün müharibəyə başladığı gündən, yəni 2022-ci il fevralın 24-dən bəri bu ölkənin həyatı pozulub.
“Football-plus.az” xəbər verir ki, müharibə futboldan da yan keçməyib. Faktiki ölkədaxili yarışların təqvimi baş-ayaq olub, oyunlar hava həyəcanı siqnalı üzündən dəfələrlə dayandırılıb və ya təxirə salınıb, futbol ictimaiyyətini nümayəndələri arasında da ölənlər və yaralananlar var. Hər halda, Ukraynanın müxtəlif yaş qrupu üzrə yığmaları və klubları beynəlxalq turnirlərdə iştirakı davam etdirirlər, ölkədaxili turnirlər pis-yaxşı keçirilir.
Premyer-liqada sona 5 tur qalmış (düzdü, “Şaxtyor” və “Dinamo” rəqiblərindən bir oyun az, yəni 24 oyun keçirib) “Şaxtyor” 58 xalla turnir cədvəlinə başçılıq edir. “Dinamo” əzəli rəqibindən 4 xal geri qalır. Bəs bu iki komandadan hansı qızıl medallara daha yaxındı? Ukraynanın müxtəlif klublarının formasını geymiş, hazırda “Veres”in məşqçilər korpusunda təmsil olunan Nikolay Lapko əmindi ki, “Şaxtyor” cari mövsümü də çempion kimi bitirəcək:
“Donetsk klubu mövsümün finişində çox asan oyun qrafikinə malikdi. Əlbəttə, güman edirəm ki, “şaxtaçılar” yenə də hansısa oyunda xal itirə bilər, ona görə ki, futbolda hər şeyi düzgün proqnozlaşdırmaq mümkünsüzdü. Hərçənd bu kiçik ehtimaldı. “Şaxtyor” Çempionlar Liqasına qatılmağın yalnız özündən asılı olduğunu hiss edir, bu şansı əldən verən deyillər”.
Lapko nə deyir-desin, “Şaxtyor”un son turlar üçün təqvimi yetərincə riskli görünür. Donetsk klubu son üç turda bir-birinin ardınca “Dinamo”, “Dnepr-1” və “Polesye” ilə qarşılaşacaq. Bu komandaların hər biri də avrokuboklara vəsiqəyə iddialıdı.
Bu arada “Şaxtyor” və “Dinamo”nun sabiq məşqçisi, əfsanəvi rumıniyalı mütəxəssis Mirça Luçesku Kiyevə baş çəkib, boş vaxt taparaq kiyevlilərin aprelin 21-də keçirdiyi, “Polesye”ni darmadağın etdikləri (3:0) çempionat oyununu da izləyib. “Dinamo”nun prezidenti İqor Surkis oyundan sonra bu haqda danışıb:
“Mister oyuna baxmağa gəlmişdi, onun komandanın necə tərəqqi etməsiylə bağlı fikirlərini dinləmək mənə xoş idi. Luçesku oyunun çox xoşuna gəldiyini dedi. Oyunboyu dominantlıq etdik, hesab 3:0-dı, amma 5:0 və 6:0 da ola bilərdi. Komanda həm funksional, həm də taktiki cəhətdən yaxşı hazırlaşır. Şovkovski işini çox yaxşı görür. Ümid edirəm ki, biz yalnız tərəqqi edəcəyik”.
Amma Luçeskunun “Dinamo” – “Polesye” oyununu izləyənlər arasında görünməsi fərqli söz-söhbətə yol açıb. Məsələn, onun “Dinamo” ilə hansısa qapanmayan, arada anlaşılmazlıq doğuran maliyyə məsələlərini həll etmək üçün gəldiyini deyənlər var. Başqa bir versiya odu ki, rumıniyalı mütəxəssis “Polesye”ni çalışdırmaq təklifi alıb. Səfərin məqsədi isə Jitomir klubunun prezidenti Gennadi Butkeviç ilə şəxsi danışıqlarda bu məsələyə qəti aydınlıq gətirmək niyyəti ilə bağlıdı. Amma Luçeskunun maraqlarını təmsil edən agent Arkadi Zaporojanu hər iki versiyanı təkzib edib:
“Qətiyyən belə bir şey yoxdu. Hər iki versiya yalandı. O, sadəcə, qonaq gəlib. Biz hələ mayda da birlikdə bura gələcəyik, bir neçə oyuna baxmaq niyyətimiz var”.
Bu arada “Dinamo”nun prezidenti İqor Surkis çempionat oyunlarında klubların başqaları tərəfindən stimullaşdırılması mövzusuna toxunub. Azərbaycanda olduğu kimi, Ukraynada da mövsümün sonuna bu mövzu aktullaşır:
“Kimin kimi stimullaşdırdığını bilmirəm. Bildiyim isə odu ki, biz zal itirməməliyik. Stimullaşdırırlar, stimullaşdırmırlar – bu mövzuda danışmaq istəmirəm. Bəlkə də stimullaşdırmaq olar, bəlkə də yox. Qadağa qoysalar, deməli, heç kim stimullaşdırmaya əl atmayacaq. Futbol meydanın 22 kişi çıxır, hər biri də maaş üçün oynayır. Biz futbolçularımıza mükafat verməliyik, başqalarını stimullaşdırmamalıyıq. Bu mənim fikrimdi”.
Son vaxtlar Ukraynada stimullaşdırmanı qanun səviyyəsində qadağan etməklə bağlı fikirlər gəzir. Bu təklif qəbil olunarsa, qadağa rəsmiləşdirilsə, belə addıma əl atan klublar intizam sanksiyaları ilə üzləşəcək.
Ukraynada 2023/24 mövsümü hələ bitməsə də, yeni mövsümün cizgiləri, tarixlərlə bağlı bəzi məqamlar bəllidi. 2024/25 mövsümü iyulun 27-də - Ukrayna Superkuboku uğrunda oyunla bağlayacaq. Qeyd etməyə dəyər ki, məlum müharibə üzündən 2022-ci və 2023-cü illərdə bu titul sahibini tapmayıb. Ölkə çempionatının yeni mövsümü isə avqustun 3-də start götürəcək.
Belədə həmin vaxt Parisdə keçiriləcək Olimpiadada mübarizə aparacaq Ukraynanın olimpiya yığmasının taleyi sual doğurur. Ruslan Rotanın rəhbərlik etdiyi komanda qrup oyunlarını iyulun 24-ü, 27-si və 30-da keçirəcək. FİFA Olimpiya Oyunlarını beynəlxalq turnir saymadığına görə klubların oyunçularını Parisə buraxmamaq hüququ var.
Digər xəbərlər
