“Ev tikmək adıyla məndən 18 min manat aldılar, vaxt da vermişdilər ki, 3 ay müddətində evim hazır olacaq. Hazırda nə ev var, nə tikinti gedir, nə də pulumuzu qaytarırlar. Mən pulumu geri almaq istəyirəm. Bu barədə polisə də müracitə etmişik, amma ordan da bir məlumat yoxdu. Sadəcə, pulumu istəyirəm. Təkcə mən deyiləm, bildiyimə görə, daha bir neçə şəxsin başına belə iş gətirib. Yanvarın 23-də “TTQ Qrup MMC” ilə müqavilə bağlamışıq. Elə müqavilə bağlayandan sonra “Access Bank”ın Badamdar filialına gedərək, Raufun hesabına 18 min manatı köçürmüşəm. Razılaşmada belə idi ki, aprelin 23-nə kimi, yəni 90 gün müddətində tikinti bitəcək və ev təhvil veriləcək. Demək olar ki, verilən vədə tamamlanmaq üzrədi, amma bunların heç nə etmək fikri yoxdu”.

“Yalnız polisə şikayət ünvanladıqdan sonra ertəsi gün bir maşın kubik və bir müddət sonra da taxta töküblər ki, guya burda iş gedir. Niyyətləri isə məni aldatmaq olub. Video da göndəriblər ki, “bax, sənin işin davam edir”. Mən də cavabımda belə şeylərə aldanmayacağımı, ya evi tikib təhvil vermələrini, ya torpağı mənim adıma keçirmələrini, ya da pulumu geri qaytarmalarını bildirdim. Qısası, nə ortada pul var, nə də torpaq bunların adınadı. Heç həmin adamın da pulunu verməyiblər. Mən taksi sürücüsüyəm. Rayondakı torpağımı satıb, üütünü borc-xərclə düzəltmişdim ki, qoy uşaqlarımın gələcəkdə evi olsun. Lakin bunlar mənə qarşı belə hərəkət etdi”.