“Rauf Quliyev “TTQ Grup” MMC tikinti şirkətinin rəhbəridi. Ev inşa etmək adıyla mənlə birgə təxminən 25 nəfərdən külli miqdarda vəsait alıb. Biz ona güvənərək istənilən məbləği ödəmişik. Məsələn, 4 ay əvvəl məndən 20 min manat pul alınıb. Ötən il dekabrın 1-də imzaladığımız müqaviləyə əsasən, 4 ay sonra ev mənə təhvil veriləcəkdi. Hələ də kirayədə qalıram. Artıq ev istəmirəm. Siyahı geniş, şikayətçilər çoxdu. Hər kəsin əlində rəsmi sənədi var. Biz müqaviləyə əsasən lazım olan addımları atmışıq. Lakin ortada nə ev var, nə də pulumuzu geri ala bilirik”.

“Rauf Quliyevin nümayəndələri internet vasitəsilə fərdi yaşayış evlərinin nəğd və kredit yoluyla tikintisinin təşkil edilməsi barədə elan verirlər. Həmin elan əsasında şirkətlə telefon əlaqəsi saxladım. Bir gün sonra Sumqayıtda şirkətin Elnur adlı nümayəndəsiylə görüşdüm. O, mənə şəhərin bir neçə nöqtəsində torpaq sahəsi göstərdi. Kotec deyilən sahədə daş hasara alınmış, ümumi sahəsi 15 sot olan torpağın 2 sotunu seçib bəyəndim. Elnur bütün sənədlər və “kupça” daxil istədiyim evin 4 ay ərzində tikilib təhvil veriləcəyini dedi. Daha sonra Bakıda şirkətin direktoru Rauf Quliyevlə tanış oldum. Müqavilə imzaladıq və ilkin ödəniş kimi 20 min manatı rəsmi qəbzlə əlbəəl ona ödədim. Qarşılıqlı razılığa əsasən, ikimərtəbəli, 5 otaqlı evin dəyəri 72 min manat təyin edildi. Yerdə qalan məbləği isə ev hazır olandan sonra 90 ay müddətində hər ay 500 manat olmaqla ödəməliydim. Bildirim ki, Rauf başqa şəxsləri də bu yolla aldadıb. Vüsal Mustafayevdən 18 min, Rizvan adlı şəxsdən 25 min, Emildən isə 21 min manat alıb. Pulumun qaytarılmasını tələb edirəm, lazım gəlsə, Allahın özünə də şikayət etməyə hazıram. Təki min bir əziyyətlə qazandığım pulu alım və haqqımı bərpa edim”.