“İndiyə kimi komandamız çox yaxşı nəticələrə imza atıb. Sadəcə, gözdən qaçan bir məqam var. Belə ki, çempionat ərzində eyni komandayla 4 dəfə qarşılaşırsansa, istər-istəməz həmişə eyni nəticə təkrarlanmır. Artıq komandalar bir-birini təhlil edir, yaxşı tanıyır. Son iki matçda rəqiblərimiz bizi çox yaxşı təhlil etmişdi. Hər ikisini layiqli qələbəyə görə təbrik edirəm. İkinci məqam futbolçuların oyuna köklənməsi, konsentrasiyası məsələsidi. Çempionatda qarşılaşdığın komandanı bir neçə dəfə məğlub edib, qənaətbəxş nəticə qazanırsansa, gənc futbolçularda konsentrasiyanın pozulduğunu düşünürəm. Sanki oyunçular “bu komandaları məğlub etmişik, yenə məğlub edərik” düşüncəsiylə meydana çıxmışdı. Digər məsələ belə oyunlarda daha az səhv etməkdi. Komandamız son iki oyunda müdafiədə çox böyük boşluqlara yol verdi. Çox sadə səhvlər etdik ki, artıq rəqib bundan yararlanıb qol vurdu. Geridönüş etmək istəsək də bacarmadıq. Hələ ki heç nə bitməyib. Qarşıda 7 tur var. Artıq futbolçularım dərk etməlidilər ki, asan rəqib yoxdu. Hər oyuna son görüş kimi çıxmalıyıq. Təbii ki, çatışmayan cəhətimiz çoxdu və bunu aradan qaldırmağa çalışacağıq. Bir başqa məqam da var. Bildiyiniz kimi, bu komanda mövsümün əvvəlində tam yığcam şəkildə əlimizdə olub. Amma sonradan bu futbolçuların parlaq çıxışı əsas komandanın məşqçilərində onlara maraq oyatdı. Bununla da 6-7 futbolçu əsas komanda ilə daim məşqə çıxdı. Belə olanda həmin futbolçular oyun gününə qədər komanda ilə bir yerdə olmur. Bu da taktiki hazırlığa böyük təsir edir. Qarşımıza hədəf kimi çempionluq qoymamışıq. Bu komandadan 7 oyunçu əsas komandaya cəlb olunubsa, deməli, böyük ölçüdə işimizi həll etdiyimizi düşünürəm. Ancaq çempionluq gözəldi - həm futbolçular, həm də məşqçilər üçün. Əlimizdən gələni edəcəyik ki, titulu qazanaq. Başqa məsələlərdən biri stadiondu. Əksər komandalar oyunlarını Binə stadionunda keçirir. Bizim komanda isə mövsüm ərzində heç bir məşqdə, oyunda süni meydançadan istifadə etməyib. Həmin stadiodakı vəziyyət də hamıya bəllidi. Biz ötürmələrlə, baxımlı futbol oynamağı sevən komandayıq. Belə meydançalarda nəinki ötürmə ilə oynamaq, ancaq mübarizə gedir. Artıq bu bizə bir siqnaldı ki, oyunçuları mübarizəli oyuna aşılamağa çalışaq. Hələ ki qarşıda 7 tur var. Yaddan çıxarmayaq ki, əvəzedicilər liqasında zəif rəqib yoxdu”.