"Qarabağ" Misli Premyer-liqasının 29-cu turunda "Tofiq Bəhramov"da "Səbail"i məğlub etdi - 4:2.

Matçdan sonra Ağdam təmsilçisinin futbolçusu Toral Bayramov "Football-plus.az"a müsahibə verdi. Müdafiəçi həm oyunla bağlı fikirlərini bölüşdü, həm də başqa məqamlara aydınlıq gətirdi.

- Matç necə keçdi?
- Düşünürəm ki, maraqlı oyun alındı. Ən azı azarkeşlərimiz məhsuldar qarşılaşma izlədi. Baxmayaraq ki, stadionda çox adam yox idi. Məncə, bizi izləyənlər zövq ala bildi. Çox şükür, qələbə qazandıq. Çempionluğu təmin etsək belə, bütün oyunlara qələbə üçün çıxacağıq.

- Ötən tur "Kəpəz" üzərində qələbədən sonra çempionluğu təmin etməyiniz budəfəki çıxışınıza necə təsir etdi?
- Bu gün sübut etdik ki, çempion olsaq da, meydana arxayın çıxmırıq. Hər rəqibə ciddi yanaşırıq. Bundan sonra da yola eyni qaydada davam edəcəyik.

- Qollarının çoxunu penalti sayəsində vurursan. Bu nə ilə bağlıdı?
- Bütün futbolçular baş məşqçinin tapşırıqlarını yerinə yetirməyə çalışır. Onun dediklərinə riayət edirik. Bəli, Qurban müəllim mənə inanır və bu işi mənə həvalə edir. Düzdü, onu bir dəfə yanıltmışam, amma başqa penaltilərin hamısını qolla bitirmişəm.

- Ölkə kubokunun yarımfinalında keçirilən "Neftçi" - "Qarabağ" oyununda daha çox "Qarabağ" azarkeşi var idi. Səncə, həmin azarkeşlər "Tofiq Bəhramov"dakı oyunlara niyə gəlmir?
- Bunu bir çox səbəblə əlaqələndirmək olar. Məsələn, "Neftçi"ylə derbimiz həmişə fərqli ab-havada keçib. Bununla yanaşı, oyun kubokun yarımfinal mərhələsində baş tutduğundan maraq böyük idi. Təbii ki, həmin azarkeşləri və daha çoxunu bütün oyunlarımızda görmək istəyərəm. Belə olsa, qarşılaşma həm onlar, həm komandalar üçün dah maraqlı olar. Tofiq Bəhramov adın Respublika stadionu 30000 yerlikdi. Ümid edirəm ki, tam dolmasa da, nə vaxtsa tribunalarda daha çox tərəfdar olacaq.

- Səncə, "Neftçi"yə qarşı cavab oyununda da birincisi kimi azarkeş coşqusu yaşanacaqmı?
- Düzü, inanmıram, lakin istərdim ki, elə olsun. Hər halda, aprelin 24-nü gözləyək.

- İlk oyunda azarkeşlər sabiq komanda yoldaşın Qara Qarayevi təhqir etdi. Buna münasibətin necədi?
- Biz hamımız Qaraya dəstək olduq. Bu barədə başqa nəsə demək istəmirəm.

RÖYANƏ OĞUZ