“İmarət” Qara Qarayevlə bağlı iki fərqli açıqlama yaydı
Xəbər verdiyimiz kimi, “İmarət” azarkeş qrupu “Neftçi” – “Qarabağ” (0:4) matçının gedişində meydan sahiblərinin futbolçusu Qara Qarayevi təhqir edib.
Fanatlar onun haqqında “Neftçi”nin köpəyi Qara Qarayev” ifadəsini səsləndirib. Buna görə fanklub tənqid hədəfinə tuş gəlib, hər kəs Qara Qarayevə dəstək verir. Maraqlısı budu ki, srağagün “İmarət tayfa” azarkeş qrupunun “feysbuk” səhifəsindəki paylaşımda futbolçunun təhqir edilməsinə haqq qazandırılıb:
“Qarayev, Qarayev, Qara Qarayev, “Qarabağ”ın igidi Qara Qarayev” - vaxtı var idi bu şüarı səsləndirən də “İmarət” idi. Futbolçuya karyerası boyunca ən böyük dəstəyi də elə azarkeşlər verir. Qara bizim sevimli futbolçumuz olub və geydiyi formanın haqqını verib. Nə Qara, nə də başqa futbolçu ilə azarkeşin şəxsi ədavəti, prinsipi ola bilməz. O cümlədən təhqirə məruz qala bilməz. Qara Qarayev əfsanəsi ola biləcəyi klubdan çıxıb həmin klubun əzəli rəqibi olan “Nefçi”ni seçəndə həmin klubun azarkeşlərinin də onu meydanda görəndə xoş qarşılamayacağına hazır olmalı idi”.
Bu paylaşımdan az sonra “İmarət tayfa” rəsmi “instaqram” hesablarında belə yazıb:
“Qeyd edək ki, adımızdan səhifələrdə və saytlarda verilən müsahibələr, açıqlamalar dezinformasiyadı, qrupumuza heç bir aidiyyatı yoxdu”.
Bəs Qaranı qınayan ilk paylaşımı kim edib? “İmarət tayfa” azarkeş qrupunun Qara Qarayevə münasibəti necədi? Bu sualları “İmarət tayfa”nın aparıcı üzvlərindən Elnur Quliyevə ünvanladıq:
“Bu yazıları hansı adminin paylaşdığından xəbərim yoxdu. Əlbəttə, Qara Qarayevin təhqir olunması düzgün deyil. Bunu “İmarət”in “vatsap” qruplarında da dedik. Qara bu təhqirlərə layiq futbolçu deyil”.
ƏSƏD SEYİDOV
Digər xəbərlər
