Dünən Azərbaycan futbolunda yeni tarixin başlanğıcı oldu. AFFA-nın növbəti Hesabat-Seçki Konfransında həm qurumun prezidenti yeniləndi, həm İcraiyyə Komitəsinin üzvləri. Xeyli vaxt idi Rövnəq Abdullayevin AFFA prezidentliyindən gediləcəyi deyilirdi.

Bir müddət əvvəl isə Abdullayev özü də namizəd olmayacağını açıqlamışdı. Məlum məsələdi ki, hadisələr bir mərkəzdən idarə olunur, namizədliyini verməmək Rövnəq bəyin öz qərarı deyil, ona belə tapşırıq verilib. AFFA rəhbərliyində dəyişiklik qaçılmaz idi. Bunun belə olacağı ölkə futbolunun əsas bəlalarından biri Elxan Məmmədov Parisə “qaçanda” bir daha dəqiqləşdi. Görünən o idi ki, məğlubiyyətdən və sorğu-sualdan qaçmağa çalışan Elxan Məmmədov FİFA-dakı əlaqələrini işə salıb, özünü “batan gəmi”dən xilas etməklə məşğuldu. Həmişə olduğu kimi, onun budəfəki hiyləgər planı da baş tutdu, adam xeyli bulanıq görünən sudan quru çıxmağı bacardı.

Məlum məsələdi ki, Rövnəq Abdullayevin AFFA-dakı prezidentliyi də formal xarakter daşıyırdı. Əslində bütün qərarlar Elxan Məmmədovla Elşad Nəsirovun beyninin məhsulu idi. Elə prezident kimi İcraiyyə Komitəsi də formal fəaliyyət göstərirdi, komitənin üzvləri toplantılarda əllərini yuxarı qaldırıb, tapşırıq icra etməkdən başqa heç bir işə yaramırdılar. Biz illər idi bunu deyirdik, isbatlayırdıq. Amma özləri etiraf etmirdi. Elxan Məmmədov iş çətinə düşən kimi deyirdi ki, mən icraçıyam, qərarları İcraiyyə Komitəsi verir. Yəni ki mən heç bir məsuliyyət daşımıram. Artıq veteran futbolçu, AFFA-dakı vəzifəsini, deməli, həm də qazancını itirmək üzrə olan İsgəndər Cavadov da dilə gəlib. Çoxdan qaçaq düşdüyü mətbuata ürəyini boşaldan Cavadov fəryad edib. Onun dilindən bu acı etirafları eşitmək çox maraqlı idi: “Biz veteranlar da orda 3-4 nəfər idik. Bizim sözümüz keçmirdi. Futbolçu dövrümdə o boyda ad-san qazanmışdım. Amma mütəxəssis kimi bu 20 ildə heç nə edə bilmədim. Buna görə çox peşmanam. Çünki mənə imkan vermədilər. Məşqçi gətirəndə bizdən soruşmurdular, gətirib deyirdilər bunu təyin etmək lazımdı. Çıxardanda deyirdilər, çıxardaq...”

Elxan Məmmədov illərlə Rövnəq Abdullayevi inandırmışdı ki, 3-4 veterana vəzifə (oxu: bir qarın çörək) verməklə onların ağzını bağlamaq, onları neytrallaşdırmaq mümkündü. Ondan sonra da istədiklərini edirdilər. Vaqif Sadıqov üçün Məşqçilər Komitəsi adlanan bir mənasız qurum yaratmışdılar, veteranların bir qisminin başını orda qatırdılar. İsgəndər Cavadovla Kazbek Tuayev də günlərini İcraiyyə Komitəsinin üzvü kimi yola verib, başlarını girələyirdilər. Artıq həmin günlər geridə qaldı. Deməli, “çörəyi kəsilən” veteranlar yavaş-yavaş danışmağa, AFFA-nın paxırlarını açmağa başlayacaqlar. Bu həm də yeni gələnlərə özlərini göstərmək istəyidi. Yəni ki, baxın da, biz Rövnəq Abdullayevi, Elxan Məmmədovu, Elşad Nəsirovu pisləyirik, onların əməllərini faş edirik, bizi yanınıza alın. Pulsuz, vəzifəsiz qalan veteranlar həm də AFFA-nın yeni rəhbərliyinə müxalifətçilik edə bilərlər ki, bu da gələcəkdə real təhlükəyə, daim tənqid edən ağıza çevrilə bilər. Şübhə etməyə dəyməz ki, “yenilər” bunu da nəzərə alıb, İsgəndər Cavadovun və başqalarının başını qatmaq üçün nəsə fikirləşəcəklər.

Olan yenə futbolumuza olacaq. Mən inanmıram ki, gedənlərin yerinə gələnlər Azərbaycan futbolunu ağ günə çıxaracaqlar. Rövşən Nəcəf AFFA prezidentliyinə alternativsiz namizəd idi. “Neft kranı”na nəzarət onun əlində olduğu üçün futbolumuzu da ona tapşırıblar. Yəqin ki, neft pulları əvvəlki qayda ilə futbolumuza axıdılacaq. Rövşən bəyin bir futbol idarəçisi kimi uğursuz kadr olduğunu “Neftçi”də görmüşük. Futbolçu dəllalı Kamil Məmmədovu başa keçiriblər, onun rəhbərliyi dövründə “Neftçi”ni birmənalı şəkildə əcnəbi mütəxəssislər çalışdırıb. Şübhə etməyə dəyməz ki, AFFA-da eyni siyasəti davam etdrəcək. Adrian Mutunun təqdimat prosesini xatırlayanda AFFA-nın bundan sonra mətbuata və ictimaiyyətə qapalı quruma çevriləcəyini də gözləməyə dəyər.

Proseslərin axarı ürəkaçan heç nə vəd etmir. Qurban Qurbanovu çıxsaq, AFFA İcraiyyə Komitəsinin yeni üzvlərinin arasında futbola can yandıran, ondan baş çıxaran isim, demək olar ki, yoxdu. Səməd Qurbanovun “Neftçi”nin Müşahidə Şurasının üzvü kimi fəaliyyəti də gözümüzün önündədi. Azarkeşlərin, mətbuatın mövqeyinə qulaq asan, onların qarşısında hesabat vermək ehtiyacı hiss edən adamlar AFFA rəhbərliyində təmsil olunmayacaq. Camaatın, yəni azarkeşlərin nə dediyinə, nə istədiyinə əhəmiyyət verilməyəcəksə, ciddi dəyişiklikdən, müsbət dinamikadan danışmağa da dəyməz.

AMAL