Futbol üzrə əsas millimiz dünən “FİFA series - Edition 2024” layihəsi çərçivəsində ilk oyununu keçirdi. Rəqib Monqolustan idi.

Matçdan əvvəl "21 aydı qələbə qazanmayan Monqolustan və Azərbaycan" sərlövhəli yazıda hadisələrin axarını təxmin etmişdik. Bildirmişdik ki, rəqib müdafiə olunmaqda ustadı, komandamız qol vurmaq üçün xeyli güc sərf etməli olacaq. Bu üzdən yığmanın rəqibə ciddi yanaşmasının və ön xətdə fəal olub ilk dəqiqələrdən müdafiə xəttini yarmasının vacibliyini vurğulamışdıq. Düzü, bunu qeyd edərkən yeganə qolun 90+1-ci dəqiqədə vurulacağını düşünmürdük. Çünki bütün detallarda rəqibdən üstün idik. Nə biləydik ki, yüzfaizlik qol imkanları 90 dəqiqə boyunca sağa-sola xərclənəcək?

Bəli, komandamız erkən qol vura bilmədiyindən qonaqların özünəinamı artdı və daha yaxşı müdafiə olunmağa başladı. Əvvəl arxa xətdə beş futbolçu vardısa, getdikcə say artdı və demək olar ki, keçilməz sədd quruldu. Arif Əsədovun qol silahları isə "pas tutmuşdu". Söhbət əsasən Ramil Şeydayev, Renat Dadaşov və Musa Qurbanlıdan gedir. Onlardan ilk ikisi azı 5 şansdan yararlana bilmədi. Ya qeyri-dəqiq zərbələrlə yadda qaldılar, ya da rəqibin qapıçısı Mönk-Erden Enktaivana məğlub oldular. Maraq üçün qeyd edək ki, Enktaivan "Ulan-Bator"un futbolçusudu və əsas heyət üzvü sayılmır. Qolkiper cari mövsümdə 4 oyun keçirib, 7 qol buraxıb. Musa özünü, ümumiyyətlə, yaxşı tərəfdən göstərmədi. Hücum mövqeyindəki ciddi çatışmazlıqdan Arif Əsədov da agah idi və özünü “sığortalamaq” üçün "forvardlar öz klublarında oyun praktikasının azlığından əziyyət çəkir. Belə anlarda onları dəvət etməliyik. Ruh düşkünlüyü var. Belə futbolçuları klublarına yaxşı əhval-ruhiyyədə göndərmək istəyirik" sözlərini demişdi. Görəsən, bir nəfər belə azarkeşin dəstəkləmədiyi, səfərdə çıxış edən, FİFA reytinqinə görə 77 pillə qabaqladığımız Monqolustan millisinə qol vura bilməyən hücumçular indi nə dərəcədə xoşbəxtdi?

Qol demişkən, yığmanı rüsvay olmaqdan Qurban Qurbanovun yetirmələri xilas etdi. Toral Bayramovun qapı önünə ötürməsini Bəhlul Mustafazadə baş zərbəsiylə "çərçivə"dən keçirdi. Əlbəttə, buna qədər Emilin tirdən, Bəhlulun dirəkdən qayıdan, Ozobiçin və Coşqunun isə "çərçivə"dən yan keçən zərbələrinə şahidlik etdik. Ümumiyyətlə, bütün futbolçular fəal idi. Sıralanan hücum cəhdlərində hər biri əlindən gələni əsirgəmədi. Lakin nəticə verən müdaxilələrin müəllifi məhz "Qarabağ"ın üzvləri oldu. Özünün də etiraf etdiyi kimi, Arif Əsədovun 80-ci dəqiqədən sonra keçirdiyi həyəcana su səpildi. Yox, bunu məcazi mənada demirik. Mütəxəssis qol vurulan kimi rahatladığını büruzə verib su içdi...

Azarkeş sayının azlığı da diqqətdən yayınmadı. Son məlumata görə, 31200 yerlik Tofiq Bəhramov stadionunda keçirilən görüşə 3954 bilet satılmışdı. Lakin tribunalarda təxminən 2500 tərəfdar gəlmişdi. Onların əksəriyyətini "Göyqurdlar" və "Milli Hooligans" fanklubları təşkil edirdi ki, azarkeş qrupları o qədər də fəal deyildi. Sadəcə, vacib epizodlarda "canlanan" tribunalarda əsasən səssizlik müşahidə edildi.

Beləliklə, millimiz yeni ilə qələbəylə başladı. Xeyirli olsun, bu öz yerində. Amma bir məqamı etiraf edək. Monqollar yığmamıza qarşı çox yaxşı hazırlaşsa da, bizimkilər rəqibi ciddiyə almamışdı. Yanıldılar. Qonaqları asanlıqla məğlub edəcəyini düşünən Arif Əsədov da yanıldı, millimizi Yaponiya ilə müqayisə edən Monqolustanın baş məşqçisi İçiro Otsuka da...

Sonda sizi matçın əsas rəqəmləriylə tanış edirik.

25 (10) qapıya ("çərçivə"yə zərbə) 6 (1)
13 korner 2
7 ofsayd 2
10 qayda pozuntusu 12
1 (0) sarı (qırmızı) vərəqə 1 (0)
73 topa sahibolma (faizlə) 27

KƏNAN BAHADIR