Millimiz “FİFA series – Edition 2024” layihəsi çərçivəsində ilk oyununu bu gün keçirəcək. Ölkənin əsas komandası "Tofiq Bəhramov"da Monqolustanı məğlub etməyə çalışacaq.

Bəs yığma ilə bağlı gözləntilər necədi? Və ya hansı yöndə olmalıdı? Təbii ki, əsas sualların cavabını final fiti səslənəndə tapacağıq. Lakin bəzi detallara nəzər salmaqda fayda var.

Millimiz tarixində ilk dəfə Monqolustan yığmasıyla qarşılaşacaq. Əksəriyyəti bizimkilərin rəqibdən qat-qat üstün olduğunu düşünür. Belədə qələbə gözləntiləri də artır. Əslində haqlıdılar. Çünki qonaqlarımız inciməsin, amma o qədər də əzəmətli deyillər. Monqolustan FİFA reytinqində 889 xalla 190-cı sıradadı (Azərbaycan: 1174 xal, 113-cü pillə - red).

Maraqlıdı ki, Monqolustan millisi sonuncu qələbəsini 2022-ci ilin iyununda Asiya kubokunun təsnifat mərhələsində qazanıb. Həmin oyunda Yəməni məğlub edən komanda (2:0) 2023-cü ildə keçirilən 6 oyunun 5-də məğlub olubsa, 1-də heç-heçə edib. Bu il isə ilk dəfə meydana çıxacaq.

Qeyd edək ki, sözügedən yığmanın uduzduğu rəqiblər arasınsa Gürcüstan da var. Qonşumuz yoldaşlıq matçında Monqolustanı darmadağın edib - 6:1. Həmin gürcülər ki, dünən AÇ-2024-ün seçmə turnirində Lüksemburqa qalib gələrək (2:0) finala vəsiqə qazandı. Daha bir Cənubi Qafqaz ölkəsinə də millimiz niyə qələbə bəxş etməsin?! Bunun üçün şans da var.

Əvvəlcə Monqolustan yığmasının baş məşqçisi İçiro Otsukanın dünənki mətbuat konfransında səsləndirdiyi diqqətçəkən məqamı xatırladaq: "Müdafiə oyunu oynayacağıq və əks-hücumda şanslarımızı axtaracağıq".

Məhz bu cümlələrə köklənməyimizin səbəbi var. Bildirək ki, bu komanda hücum cəhdlərində yox, müdafiə olunmaq üzrə ustalaşıb. Yığmanın son 8 məğlubiyyətindən 6-sı 0:1 hesablıdı. Deməli, millimiz möhkəm səddi yara bilmək üçün çox çalışmalı olacaq. Hər halda, matçın favoriti təmsilçimizdi. Həm doğma meydan və azarkeş dəstəyi, həm də aradakı güc balansı baxımından. Komandamızın son dönəmlərdə qat-qat güclü rəqiblərə qarşı yaxşı oyunla yadda qaldığını nəzərə alsaq, ümidli olmağa dəyər.

İndi isə yığmanın təxmini start heyətinə nəzər yetirək: Şahruddin Məhəmmədəliyev, Bəhlul Mustafazadə, Bədavi Hüseynov, Elvin Cəfərquliyev, Amin Seydiyev, Coşqun Diniyev, Ceyhun Nuriyev, Emin Mahmudov, Elvin Camalov, Ramil Şeydayev, Renat Dadaşov.

Beləliklə, yığmanın rəqibə ciddi yanaşmasını və ön xətdə fəal olub ilk dəqiqələrdən müdafiə xəttini yarmasını gözləyirik.

Uğurlar, milli!

KƏNAN BAHADIR