Son aylar Almaniya futbolu üçün heç də asan keçmədi. Bundesliqanın rəhbərliyi daha zəngin İngiltərə premyer-liqasından maliyyə geriliyini aradan qaldırmaq üçün yeni səhmdar cəlb etmək ideyası ilə alışıb-yansa da, azarkeşlər qətiyyətlə buna qarşı çıxdılar.

"Football-plus.az" xəbər verir ki, onların etiraz aksiyaları bir neçə tur davam etdi. Tribunalardan meydana atılan yüzlərlə tennis topu və qızılı şokolad sikkələri, qapılara vurulan qıfıllar və meydanın üzərində idarətmə pultu ilə uçurulan təyyarələr üzündən dəfələrlə oyunları dayandırmaq lazım gəldi. Belə görünür ki, Almaniyadakı futbol həvəskarları hədəfinə çatdı – Almaniya Futbol İttifaqı (DFL) əcnəbi səhmdarla müqavilə bağlamaq fikrindən daşındı. Klublar əvvəlcə ideyanın əleyhinə idi.

İş ondadı ki, hələ ötən mövsümün gedişində DFL rəhbərliyi klublarla maliyyə durumunu yaxşılaşdırmaq məsələsini müzakirə etdi. 2013-cü ilin yazında klublara səhmdarların cəlb olunması üzrə layihəni göstərdilər. Bu layihə 1-ci və 2-ci bundesliqa klublarının növbəti 20 ildə media və başqa kommersiya hüquqlarının satışı üzrə gəlirlərinin 12,5 faizinin satışını nəzərdə tuturdu. DFL onda səhmdar axtarışına çıxdı və qarşıya hədəf qoydu ki, bu sövdələşmədən 2 milyard avro qazansın. Layihənin təsdiqlənməsi üçün 1-ci və 2-ci bundesliqada mübarizə aparan klubların üçdəikisinin razılığı tələb olunurdu. Ancaq səsvermə hər şeyi dəyişdi: 36 komandadan yalnız 20-si yeni ideyaya “hə” dedi. Zəruri səs sayını toplamaq mümkün olmasa da, səhmdar cəlb etməklə bağlı ideya unudulmadı.

Layihənin yeni variantı
DFL ötən ilin dekabrında əvvəlki layihənin müasirləşdirilmiş variantını təqdim etdi. Bu dəfə klublara kommersiya və media gəlirlərinin 8 faizini növbəti 20 il üçün milyard avroya satmaq təklif olunurdu. Və dərhal da səhmdar tapıldı – “CVC Capital Partners” və “Blackstone” şirkətləri. Bu dəfə keçirilən gizli səsvermədə 24 komanda razılıq verdi, bununla da yeni ideya yolunda “yaşıl işıq yandı”.
Almaniya Futbol Liqasının rəhbərliyini anlamaq olar. Axı, doğrudan da, bundesliqa əsas rəqibindən premyer-liqadan gəlirlər baxımından cidd şəkildə geri qalır.

Premyer-liqada və bundesliqada hüquqların satışından gələn pul
Daxili bazarda hüquqların satışına görə gəlir 1,75 milyard avro 1,1 milyard avro
Xarici bazarda hüquqların satışına görə gəlir 1,9 milyard avro 200 milyon avro

Azarkeşlərin mövqeyi
Bütün bu hadisələr Almaniya ərazisini əhatə edən azarkeş etirazlarına start verdi. Birinci və ikinci bundesliqada yarışan 36 komandanın fanat birliyi birgə bəyanat yayaraq DFL rəhbərliyinin fəaliyyətini tənqid etdi: “Biz Almaniya futbolunun necə satılmasını seyr etməyə hazır deyilik. Çox geniş reklam olunan 12-ci oyunçunun (azarkeşin) Almaniya Futbol Liqasının şübhəli səhmdarlarla sövdələşməsinin bir hissəsi olmağa hazır olmadığını aydın şəkildə göstərmək üçün 12 dəqiqə susacağıq".

Daha sonra konkret klubların fanat qrupları tərəfindən sövdələşmə əleyhinə ayrıca manifestlər də yayımlandı. Mahiyyət eynidi: belə sövdələşmə Almaniya futbolunun kommersiyalaşdırılması naminə onun ənənələrini məhv edəcək.

Anlamaq lazımdı ki, Almaniyada azarkeşlərlə komandalar arasında xüsusilə həssas münasibət var. “50+1” qaydası mövcuddu ki, buna görə, özəl səhmdarlar və sponsorlar kluba sahiblik hüququnun 49 faizindən artığına malik ola bilməzlər.

İki ay ərzində bütün Almaniya üzrə azarkeşlər öz mövqeyini bildirdi. Bundesliqanın 21-ci turunun "Bayer-04" - "Bavariya" matçı (3:0) istisna olmadı. Mövsümün ən çox gözlənilən oyunu vaxtında başlamadı: Leverkuzendəki stadionun əməkdaşları təxminən səkkiz dəqiqə ərzində yad əşyalarla örtülmüş meydançanı təmizlədilər.

Başqa bir nümunə: eyni turun "Union" - "Volfsburq" (1:0) görüşü. Oyunu iki dəfə dayandırmaq lazım gəldi, bu üzdən birinci hissəyə az qala yarım saat əlavə olundu! Nəticədə azarkeşlərin davranışı sayəsində rekord qol gördük - bu, ilk hissəyə artırılan 25-ci dəqiqədə vuruldu.

2-ci bundesliqanın “Hamburq” – “Hannover-96” matçında (3:4) bəlkə də ən yaradıcı etiraz aksiyası təşkil olundu. Fasilə zamanı bir neçə azarkeş sakitcə qapıya doğru yollandı və hər dirəyə üçü olmaqla altı qıfıl vurdu. İkinci hissənin başlanğıcı gecikməli oldu, kəsmə aparatı olan adamlar meydana çağrıldı.
“Hanza” və “Hamburq” (2:2) azarkeşləri də kreativ ideya ilə çıxış etdi. Stadionda əsl şou nümayiş etdirildi: iki kiçik “cip” göy və ağ tüstü buraxırdı. Yazıq stüardlar bir neçə dəqiqə maşınları təqib etdilər. Onları kimin idarə etdiyi aydındı - tribunada olan azarkeşlər.

Bundan sonra fanatlarının səsinin lazımi ünvanlara çatdığı qəti şəkildə aydın oldu. Əvvəlcə DFL rəsmi şəkildə “Blackstone” şirkətinin sövdələşmədən çıxdığını elan etdi, ardından, ümumiyyətlə, əcnəbi səhmdarla müqavilə bağlamaqdan imtina etdiyini bildirdi. DFL-in sədri Hans-Yoahim Vatske qərarı ictimaiyyətə belə açıqladı: