Almaniya futbolunda 24 may tarixini səbirsizliklə gözləyirdilər. Belə ki, həmin gün yeni sərmayə planı ilə bağlı elita və 2-ci bundesliqa klubları arasında səsvermə keçirildi. Amma qəribədi ki, bu plan qəbul olunmadı!

"Football-plus.az" xəbər verir ki, plan ondan ibarət idi ki, qarşıdakı 20 il ərzində teleyayın hüququnun səhmlərindən əldə olunan gəlirin 12,5 faizi əcnəbi investorlara satılmalıydı. Bu, dərhal ölkə futboluna nə az, nə çox – düz 2 milyard avro qazandıracaqdı! Bu pulun 45 faizi infrastruktura, 40 faizi futbolda rəqəmsal texnologiyaların inkişafına xərclənəcəkdisə, qalan 15 faiz (təxminən 300 milyon avro) klublar arasında bərabər səviyyədə bölüşdürüləcəkdi. Yeni planın qəbul olunması üçün şərt sadə idi. 1-ci və 2-ci bundesliqada mübarizə aparan ümumilikdə 36 klubdan ən azı 24-ü razılıq verməli idi. Səvermənin nəticələri isə gözlənilməz oldu. 20 klub lehinə, 11 klub əleyhinə səs verdisə, 5 klub bitərəf qalmağa üstünlük verdi. Ölkə futboluna yeni investorların cəlb olunmasının əleyhinə çıxanlar ilk növbədə 2-ci bundesliqa təmsilçiləri oldu. Onlara bundesliqadan “Köln” və “Auqsburq” kimi ortabab kollektivlər də qoşuldu. Hadisələrin belə axarı, təbii ki, Almaniya Futbol Liqasının (AFL) sədri Hans-Yoahim Vatskeni məyus etdi: “Bavariya” və “Borussiya” başda olmaqla bəzi klublar bu layihəni dəstəkləyirdi. Biz liqaya yardım əlini uzatdıq. Ölkə futbolunda çox ciddi yenilik ola bilərdi. Biz həqiqətən də bunu edə bilərdik. Böyük klublar mütləq bir araya gəlib bundan sonrakı addımları müzakirə edəcəklər. Bu cür səsvermədən sonra yaxın gələcəkdə heç kim bizə sözü bir yerə qoya bilməməyimizdən şikayətlənməsin”. Layihənin əsas əleyhdarı “Sankt Pauli”nin prezidenti Otto Göttlix oldu: “Biz ilk növbədə konkret strategiyanı müəyyənləşdirməliyik. Yalnız bundan sonra onun maliyyələşməsi ilə bağlı qarşıya qoyulan hədəflərə çata bilərik. Elə yerli futbolsevərlər tərəfindən də potensial investorların cəlb olunması pozitiv qarşılanmamışdı”.

Bəs bundan sonra nə olacaq? Bu olay ölkə futboluna pis mənada təsir edə bilərmi? Çox güman, edə bilər. Çünki 1-ci və 2-ci bundesliqanın bir-birindən ayrılması ehtimalı yaranıb. Elita klubları “Bavariya” və Dortmund “Borussiya”sının liderliyi altında AFL-in tərkibindən çıxa bilər. Onlar öz assosiasiyalarını yaradaraq Almaniya Futbol İttifaqına qoşula bilərlər. Bu isə ona gətirib çıxaracaq ki, bundan sonra 1-ci və 2-ci bundesliqa teleyayın haqları ilə bağlı məsələləri (İngiltərədə olduğu kimi) ayrı-ayrılıqda həll etməli olacaq. Hər halda, hadisələrin belə axarından uduzan tərəf 2-ci bundesliqa olacaq. Çünki (vergiləri çıxdıqdan sonra) yayın haqqından 2-ci bundesliqa 80 milyon avro, 1-ci bundesliqa isə 240 milyon avro qazanır.