Türkiyədə uzun illər ''Trabzonspor'' forması geymiş İbrahim Yattara hələ də həvəskar səviyyədə çıxış edir.

"Football-plus.az" xəbər verir ki, hazırda 43 yaşı olan qvineyalı futbolçu bu yaxınlarda Sivas bölgəsinin həvəskarlar liqasında çıxış edən ''İmranlıspor''a transfer olundu. Ötən həftəsonu Yattara yeni klubunda debüt matçına çıxsa da, görüş qalmaqalla yekunlaşdı. Türkiyə futbolunda hakimin fiziki təzyiqə məruz qalmasının daha bir örnəyi yaşandı. ''İmranlıspor''la ''Cümhuriyyət Universiteti''nin üz-üzə gəldiyi oyunda Yattara 68-ci dəqiqədə meydana çıxaraq debüt etdi. Həmin an Yattaranın komandası artıq 3:0 öndə idi. Amma 2 dəqiqə sonra ''Cümhuriyyət Universiteti''nin kapitanı Əmrə Uyanık hakimə rəqib oyunçunun meydanı gec tərk etməsi ilə bağlı etirazını bildirdi. Etiraz bir qədər sərt formada edildiyi üçün hakim futbolçuya qırmızı vərəqə göstərdi. Əsəblərinə hakim ola bilməyən Əmrə Uyanık ədalət təmsilçisinin sifətinə zərbə endirdi. Bundan sonra ara qarışdı. Yan xətt hakimi də Əmrə Uyanıkın komanda yoldaşları ilə mübahisə etdi. Münaqişə böyüdüyü üçün polislər meydana çıxmalı oldu. Yalnız onların müdaxiləsindən sonra vəziyyət sakitləşdi. Oyun isə yarımçıq dayandırıldı. Hakimə zərbə vuran Əmrə Uyanık ifadəsi alınması üçün polis bölməsinə aparıldı.

ƏLİ