"Görüş iyunun 1-də "Türk Hava Yolları Futbol Mərkəzi”ndə keçirilib. Baş hakim Tural Qurbanov, köməkçiləri Rəhman İmami ilə Zöhrab Abbasov idi. 4-cü hakim funksiyasını isə Şamil İmamzadə yerinə yetirirdi. Görüş 2:1 hesabı ilə İlyas Qurbanovun köməkçisi olduğum “Neftçi”nin qələbəsi ilə başa çatdı. Baş hakimin premyer-liqa təcrübəsi görünürdü, oyunu yüksək səviyyədə idarə edirdi. Kadrlara da baxa bilərsiz, "Neftçi TV" ilə canlı yayınlanıb, “yutub”a da yerləşdirilib. 85-ci dəqiqədə rəqibin futbolçusu topu itirəndən sonra bizim oyunçumuza qarşı sərt oynadı. Futbolçumuz meydanın kənarındakı dəmir tora çırpıldı. Bizim komandadan kobud oynayan futbolçuya yaxınlaşıb etiraz edənlər oldu, rəqib oyunçular da yaxınlaşdı. Ara sakitləşəndən sonra hakim rəqibin başqa futbolçusuna sarı vərəqə göstərdi. Mən də 4-cü hakimə yaxınlaşdım. Əlimlə çiyninə ehmalca toxunub, “yoldaş hakim, ora bax, ora bax” dedim. Həmin vaxt oyunçumuz hələ də yerdə idi və həkim ona yardım edirdi. Şamil İmamzadəyə “mikrofonun da var, baş hakimə de ki, vərəqəni səhv göstərib” söylədim. Çünki kobudluq edən ikinci “sarı” ilə meydandan qovulmalı idi. Amma hakim qarışıqlıq zamanı bunu ayır edə bilməmişdi. Ona toxunmağım və ya sözüm xoşuna gəlmədi. Dərhal mikrofonla baş hakimi yanına çağırdı. Mənə isə “sən bilmirsən ki, hakimə toxunmaq olmaz” dedi. Baş hakimə durumu izah etsəm də, gülümsəyərək qırmızı vərəqə göstərdi. Mən də gülümsədim və meydanı tərk etdim. Buna görə 10 oyunluq cəzaya layiqəmsə, deyiləcək sözüm yoxdu. 10 ildi məşqçi işləyirəm, bu il 40 oyunda bir sarı vərəqə belə görməmişəm. Aqressiv biriyəmsə, fiziki təzqiq edənəmsə, bu günə kimi niyə belə hal baş vermirdi? Fikrimcə, burda yanlış anlaşılma var".