Lionel Messi tarixin ən uğurlu və yüksək ödənişli futbolçularından biridi, ancaq təxminən 650 milyon dollarlıq sərvətlə klubu “İnter Mayami”də bu baxımdan birinci deyil. Əfsanəvi argentinalının komanda yoldaşları arasında biri var ki, ailəsi ikiqat artıq zəngindi.

"Football-plus.az" xəbər verir ki, 23 yaşlı ekvadorlu Leonardo Kampana 1,5 milyard dollarlıq sərvətin sahibi sayılır. Futbolçunun anası İzabel Kampana iri kənd təsərrüfatı torpaqlarının, daşınmaz əmlakın və turizmin sahibidi. Atası Pablo Kampana məşhur ekvadorlu siyasətçi və biznesmendi. Bir neçə il əvvəl ölkənin ticarət naziri idi, indi isə vətənində nəhəng developer şirkətinin baş direktoru və yaradıcısıdı.

Ata Kampana peşəkar tennisçi olub. Atlanta Olimpiadasının tennis turnirində Ekvadorun şərəfini qoruyub. 1996-cı ildə ATP reytinqində 165-ci yerdə olub, bir il sonra isə karyerasını bitirib. Yeri gəlmişkən, 51 yaşlı biznesmen futbolu heç də tennisdən az sevmir. Təsadüfi deyil ki, oğlunun klubunun rəhbəri Devid Bekhemlə dostluq münasibətləri saxlayır.

Məhz Pablo yeniyetmə Leonardonun əlindən tutaraq futbol məktəbinə aparıb. Kiçik Kampana 16 yaşında “Barselona” ilə müqavilə imzalayıb. Messinin həmin vaxt şərəfini qoruduğu İspaniya təmsilçisi ilə yox, Ekvadorun Quayakil şəhərindən olan eyniadlı komanda ilə. Hücumçu 19 yaşında ölkəsinin gənclər yığmasında debüt edib, bu komanda ilə Cənubi Amerikanın çempionu olub, turnirin ən yaxşı bombardiri adını qazanıb, ardından U-20-lər arasında Polşada keçirilən dünya çempionatında iştirak edib.

Futbolçunun Avropaya köçü heç də uğurlu olmayıb. Kampana “Vulverhempton”un gənclər komandasından əsas heyətə düşməyə çalışsa da, buna nail ola bilməyib. Portuqaliya “Famalikan”ında və İsveçrə “Qrasshopper”ində qısamüddətli icarədən sonra Leo Amerikaya qayıdıb və “İnter Mayami” ilə müqavilə bağlayıb. MLS liqasında çıxış edən klubda, demək olar ki, hər iki oyundan bir qol vurur.

“Transfermarkt” 23 yaşlı forvarda 3,5 milyon avro qiymət qoyub, o, MLS-də keçirdiyi 52 oyunda 20 qol vurub. Kampana futbolla yanaşı, bir neçə reklam müqaviləsi də bağlayıb, bunun sayəsində valideynlərinə maddi yardım üçün müraciət etməli olmur. Leonardo səyahət vurğunudu, qız dostu Ariana ilə yer kürəsinin müxtəlif nöqtələrinə yollanır.

Futbolçunun maraqları arasında paraşütlə tullanma da var, ümumiyyətlə, çox məşğul həyat yaşayır. Sosial şəbəkələrdə müntəzəm Qalapaqosda və ya Havay adalarında istirahət, səmada uçuş zamanı çəkilən şəkillərini yerləşdirir. Kampananın rəssamlığa da həvəsi var. Leonardo pop-art ilə maraqlanır, müasir müəlliflərin rəsmlərini toplayır. Mayamidəki dostları arasında məşhur rəssam Leonardo İdalqo da var.

Təbii ki, Kampana Messi ilə oynadığına görə xoşbəxtdi. Müsahibəsində etiraf edir ki, “Lionel komandaya mənəvi dinclik verir, meydanda məsləhətlərini əsirgəmir, matçlardan əvvəl danışır və meydanda hər şeyə qadir olmasına baxmayaraq, özünü başqalarından üstün tutmur”.