Möhtəşəm Bakı derbisi: 4 qol, 3 qırmızı vərəqə, 2 penalti!
Ötən gün 1-ci liqada 15-ci tura start verildi. İlk oyun Bakı derbisi ilə əlamətdar oldu.
Çempionluğa ən real namizədlər – MOİK-lə “Qaradağ Lökbatan” üz-üzə gəldi. Mövsümün ikinci hissəsinə istədiyi kimi başlaya bilməyən komandalar qələbə ilə zirvəyə dönməyi hədəfləyirdi.
Tribunalarda hər iki komandanın azarkeşlərinə rast gəlmək mümkün idi. Binə qəsəbə stadionunun oturacaqlarının sol tərəfində lökbatanlılar, sağ tərəfində isə “hərbçilər”in fanatları yerləşmişdi. Hər iki sektorda komandaların bayraqları asılmışdı, azarkeşlər ara-bir bəstələr oxuyurdu. MOİK-in fanatları isə emosionallığı ilə seçilirdi. Onlar baş hakimin, demək olar ki, bütün qərarlarına etiraz edir, onu ədalətli oyuna səsləyirdilər.
Oyun qonaqların üstünlüyü ilə başladı. İlk təhlükəli hücum 2-ci dəqiqədə reallaşdı. Xəlil Bəşirov hesabı açmağa yaxın olsa da, Zeynal Əhmədzadə ona imkan vermədi. Çox keçmədən qonaqlar daha bir dəfə meydan sahiblərinə həyəcan yaşatmağı bacardı. Mikel Badejonun cərimə meydançası kənarından vurduğu top az fərqlə qapıdan yan keçdi. Müdafiənin səhvindən yararlanan Rayan Guiberonun zərbəsi isə qapıçının düz üstünə getdi. “Qaradağ Lökbatan”ın bu təzyiqi özünü 5-ci dəqiqədə doğrultdu. Fərid Mahmudov fərdi reydini qolla tamamladı. 29-cu dəqiqədə Kənan Cəfərovun zərbəsi yaddaqalan oldu. Lakin futbolçu “çərçivə”yə düşə bilmədi. Meydan sahibləri ən real qol vəziyyətini 31-ci dəqiqədə yaratdı. Qapıçı ilə üzbəüz qalan Ramil Orucov topa zərbə endirə bilmədi. Əvəzində qonaqlar fərqi 2-yə çatdırdı. Kornerdən gələn ötürməni Rayan Guibero başla tamamladı – 2:0. Amma onların sevinci 1 dəqiqə çəkdi. Dərhal hücuma atılan MOİK Elmir Rəhimzadənin qolu ilə fərqi minimuma endirdi.
İkinci hissəyə ordu klubu fəal başladı. 55-ci dəqiqədə Həsrət Mürsəlovun zərbəsini qapıçı dəf etdi. Real qol vəziyyətləri yaratmaqda çətinlik çəkən meydan sahibləri 80-ci dəqiqədə penalti ilə cəzalandı. Referi Rəvan Həmzəzadə Josef Akyama qarşı kobudluğu 11 metrlik cərimə zərbəsi kimi qiymətləndirdi. Topin arxasına 2-ci qolun müəllifi Guibero keçdi. Lakin o, Zeynal Əhmədzadə ilə dueldən məğlub ayrıldı. Qolkiper topu dəf etməyi bacardı. Matçın sonları dramatik keçdi. Guibero təxminən 5 metrdən dəqiq ola bilmədi. Həmin dəqiqələrdə meydanda vəziyyət gərginləşdi. Öncə MOİK-in köməkçi məşqçisi Orxan Səfiyarov hakimi təhqir etdiyi üçün qırmızı vərəqə aldı. Ardından komandanın futbolçusu Nazim Məmmədzadə yan xətt hakimi ilə problem yaşayaraq, meydandan qovuldu. Son saniyələrdə isə Guibero cərimə meydançasında topa əllə toxunduğu üçün qırmızı vərəqə ilə cəzalandırıldı. Penaltini Elmir Rəhimzadə yerinə yetirdi. O, həm dublunu rəsmiləşdirdi, həm də komandasına 1 xal qazandırdı. Beləliklə, komandalar ilk dövrədə olduğu kimi (1:1), yenə meydandan bərabərliklə ayrıldı – 2:2.
Oyundan sonra meydanda ən yaxşılardan olan Elmir Rəhimzadə ilə söhbətləşdik:
“Güclü rəqiblə qarşılaşdıq. “Qaradağ Lökbatan” çempionluğa oynayan komandadı. Biz də iddiamızı gizlətmirik. Birincilik uğrunda mübarizə aparırıq. Maraqlı görüş oldu. Qələbə qazanmaq üçün əlimizdən gələni etdik. Təəssüf ki, 1 xalla kifayətləndik. Düşünürəm ki, bu gün 2 xal itirdik. Çempionluğa oynayırıqsa, hər oyuna qələbə üçün çıxmalıyıq. Rəqibin kimliyindən asılı olmayaraq, tək amalımız 3 xal qazanmaqdı. Çempion olmaq üçün sona qədər döyüşəcəyik. Növbəti matçlara baxacağıq. Penaltini epizoduna gəlincə, açığı, tam görə bilmədim. Bu üzdən nəsə deyə bilməyəcəm. Hakim də bizim kimi insandı. O da səhv edə bilər”.
Daha sonra MOİK-in baş məşqçisi Qəzənfər Abbasova müraciət etdik. O, matç haqda düşüncələrini bölüşdü:
“Meydana qələbə üçün çıxmışdıq. Ağır oyun oldu. Görüşün belə keçəcəyini bilirdik. Sadəcə, erkən qol buraxdıq. İlk 15-20 dəqiqə oyuna köklənə bilmədik. Rəqib iki qol vurdu. Lakin futbolçularım xarakter göstərdilər, mübarizə apardılar. Yenə də şükürlər olsun ki, ən azı uduzmadıq, heç-heçə elədik. Qələbə qazanmaq olardı. Oyun da bunu göstərirdi. İkinci hissə, demək olar ki, bizim üstünlüyümüzlə keçdi. Epizodları dəyərləndirə bilmədik. Rəqibin də bir neçə təhlükəli hücumu oldu. Penaltini dəqiq yerinə yetirə bilmədilər. Biz isə risk elədik. İrəli atıldıq. İstədiyimiz xalı qazandıq”.
- Çempionluq uğrunda əsas namizədlərdən sayılan komandaların duelini izlədik. Bu gün bir xal qazandız, yoxsa iki xal itirdiz?
- İki xal itirdik. Düzdü, rəqib də güclü komandadı. Amma imkanları dəyərləndirə bilmədik. Hakimlər də imkan vermədilər ki, futbol oynayaq. Hər epizodu cərimə kimi qiymətləndirdilər. Belədə oyunun tempi aşağı düşdü.
- Həm köməkçiniz, həm də futbolçunuz qırmızı vərəqə ilə cəzalandırıldı. Həmin qərarlar ədalətli idi?
- Nazim Məmmədzadənin “qırmızı”sı ədalətsiz idi. Çünki həmin epizodda yan xət hakimi futbolçumuzu təhqir etdi. Hakim söyüş söyürsə, oyunçu nə etməlidi? O da cavab verdi. Hakim olasan, söyüş söyəsən... Nə bilim. Onu mən də eşitdim, yanımdakılar da eşitdi. Bizə yaraşmaz ki, yalan danışaq. Düzdü, o, yenə də özünə haqq qazandıracaq ki, təhqir etməmişəm. Amma belə olmaz. Ayıbdı. Laysman onu “qırmızı”ya məcbur elədi. Hakim futbolçunu təhqir etməsə, o da söyməyəcəkdi. Köməkçimə isə qırmızı vərəqə etiraza görə verildi. Həmin epizodda da referini ehtiyat hakim çağırdı. Məşqçimiz aqressiv və emosional idi. Həmin qərara qarışa bilmərəm.
“Qaradağ Lökbatan”ın baş məşqçisi Azər Həşimov da oyunla bağlı “Futbol+”ə danışdı:
“Komandam ilk hissədə daha yaxşı çıxış etdi. Daha istəkli tərəf biz idik. 2:0-dan sonra gözləmədiyimiz halda qapımızda qol gördük. İkinci yarıda da bir xeyli epizodumuz oldu. 11 metrlik cərimə zərbəsini də dəqiq yerinə yetirə bilmədik. Həmin penaltini qola çevirsəydik, oyunun taleyi başqa ola bilərdi. Futbolda belə hallar olur. Qələbəni son dəqiqələrdə əldən verdik. Yaxşı oynadığımız qarşılaşmada 2 xal itirdik. Qapımıza təyin olunan penalti haqlı qərar idi. Qapıçının səhvindən sonra top Guiberonun əlinə dəydi. Həm penalti, həm də qırmızı vərəqə ilə razıyam”.
İSMAYIL XEYRULLAYEV
