Almaniya polisi Oberhauzen şəhərində ukraynalı basketbolçu Vladimir Yermakovun qətli ilə bağlı aparılan istintaq çərçivəsində üç yeniyetməni həbs edib. Bu barədə “Spiegel” məlumat yayıb. Jurnalın məlumatına görə, şübhəlilər arasında Herndan olan 14 yaşlı oğlan və Helzenkirhendən olan 14 və 15 yaşlı iki məktəbli var. Onların hamısı ilə bağlı araşdırma aparılır.

Almaniya jurnalı onu da aydınlaşdırır ki, cinayətin motivləri hələ müəyyənləşir. Hüquq-mühafizə orqanlarında bunun ksenofobiya zəminində törədilə biləcəyinə dair konkret sübutlar yoxdu.

Ukraynanın “Strana.ua” nəşri öz “teleqram” kanalında yazır ki, əsas şübhəli ukraynalı basketbolçunun qətlindən bir gün sonra saxlanılan 15 yaşlı almandı. İstintaq hesab edir ki, məhz o, Yermakova bıçaqla xəsarətlər yetirib və bunlar ölümcül zərbələr olub.

17 yaşlı Yermakov fevralın 12-də Düsseldorf regionunda yerləşən Oberhauzen şəhərində qətlə yetirilib. Ukrayna mətbuatı xəbər verir ki, o, növbəti matç ərəfəsində gənc həmkarı Artyom Kozaçenko ilə birlikdə idman ayaqqabısı almağa gedib və orda ərəb ölkələrindən birindən olan mühacirlərin hücumuna məruz qalıb. “Bild” qəzeti xəbər verir ki, avtobusda idmançılarla bir qrup tələbə arasında münaqişə başlayıb və Yermakov əsas şübhəli olan 15 yaşlı alman-türk əsilli məktəbli tərəfindən bıçaqlanıb. Onunla eyni zamanda bıçaq xəsarəti alan Kozaçenko isə hazırda reanimasiyadadı.