Dünyanın sabiq bir nömrəli tennisçisi Rafael Nadalın istedadının vurğunları üçün heç də xoş olmayan xəbərimiz var.

"Football-plus.az" xəbər verir ki, İspaniyalı ulduz fevralın 19-24-ü aralığında Qətərin paytaxı Dohada keçiriləcək ATP turnirinə qatılmayacağını bildirib. Xatırladaq ki, 37 yaşlı Nadal omba zədəsi üzündən yanvarda keçirilən “Australian Open”ə də qatılmamışdı. İspaniyalı bu mövsüm yalnız Brisbendə keçirilən turnirdə iştirak edib və 1/4 finala qədər irəliləyib: “Təəssüf ki, Dohaya getməyə və turnirdə iştirak etməyə hazır deyiləm. 2014-cü ildəki unudulmaz qələbədən sonra bir daha Qətərdə olmağı çox istəyirdim”.

Artıq martın 4-17-si aralığında ABŞ-in İndian-Uels şəhərində keçiriləcək “Masters” seriyalı turnirə qatılmaq üçün hazırlaşacağını deyən Nadal bir çox başqa açıqlamalar da verib. Əvvəlcə onun kişi və qadınlar arasındakı tennis turnirlərində mükafat fondunun eyniliyi haqda fikirlərini dinləyək: “Mənim üçün mükafat fondunun bərabərliyi kiməsə pul verməkdən ibarət deyil. Serena Uilyams məndən çox qazanırsa, tribunaları doldurursa, mən yalnız Rafael Nadal olduğuma görə ondan çox qazanmaq istəmirəm. Bərabərlik istəyirəm. Qadınlar həqiqətən də yüksək qazancı formalaşdırırsa, oyunu ilə auditoriya toplayırsa, qoy lap kişilərdən çox qazansınlar”.

“Böyük dəbilqə” turnirlərinin 22 qat qalibi dünya reytinqinin lideri, 36 yaşlı serb tennisçi Novak Cokoviç və daha bir əbədi rəqibi – isveçrəli Rocer Federer ilə münasibətlərinə də toxunub: “Novakı yaxşı adam sayıram. Onun uğurunu görəndə qəzəblənmək istəmirəm. Deyərdim ki, Novak tarixin ən yaxşı tennisçisidi. Onun bədəni mənimkindən yaxşıdı, bunun da önəmi var. Federerə gəlincə... Karyeramızın böyük hissəsini birlikdə keçirmişik. Bir-birimizə yardım etmişik. Özümüzə münasibətdə elə tələbkarlıq səviyyəsinə çatmışdıq ki, bunu təkrarlamaq çətindi. Ona görə ki, uğursuzluğa düçar olmaq lüksümüzün olmadığını bilirdik. Bu qarşıdurma bizi son həddə çatdırmışdı. Roceri özümə dost saymıram, ancaq aramızda gözəl münasibətlər var”.
İspaniyalı ulduzla söhbətdə gənc həmkarı və həmvətəni Karlos Alkarasdan söz düşməsi də təbiidi. Nadal bu haqda suala cavab verərkən 20 yaşlı ulduzun ünvanına tərif yağdırmaqdan çəkinməyib: “O, çox yaxşı və çox gəncdi. Baxaq görək çətinliklərin öhdəsindən necə gələcək, orqanizmi bunlara necə reaksiya verəcək. Karlos qeyri-adi tennis səviyyəsi göstərir. Supermükəmməl oyunçudu. Bu yaşda tennisçi üçün heç bir zəiflik görmürəm. Mən Karlosun yaşında olanda onunla müqayisədə topu oyuna daha pis daxil edirdim, uçan topa daha pis zərbə vururdum, soldan zərbəm yaxşı deyildi”.