Hələ bir neçə həftə əvvəl İtaliya çempionluğuna real namizədlərdən sayılan “Yuventus” üçün 24-cü tur da uğursuz alındı.

"Football-plus.az" xəbər verir ki, Massimiliano Alleqrinin komandası “Udineze”yə minimal hesabla uduzmaqla cari mövsümdə öz meydanında ilk məğlubiyyətini aldı. Daha əvvəl “İnter” (0:1) və “Empoli” (1:1) ilə keçirilən matçlarda hesabına yalnız bir xal yaza bilən turinlilər indi “İnter”dən 7 xal geri qalırlar. Liderin ehtiyatda bir təxirə salınan oyununun olduğunu nəzərə alsaq, “Yuventus”un skudetto uğrunda real mübarizəyə qoşulmaq şansının yetərincə azaldığı aydındı. Baş məşqçi Alleqri “Udineze” ilə bazar ertəsi keçirilən matçdan sonra mətbuat konfransında aktual sualları cavablayıb.

- Gözlənilməz məğlubiyyətdi. İlk hissədə futbolçuları daha cəsarətli olmağa çağırırdınız, amma komandanızda məhz bu amilin çatışmadığı aydın göründü...
- Belə deyək, bu, bir qədər özünəməxsus məqamdı, ona görə ki, son 3 oyunda yalnız 1 xal qazanmışıq və buna görə təəssüflənirk. Amma sakitliyi qorumaq lazımdı, çünki qarşımıza konkret hədəf qoyulub – Çempionlar Liqasına vəsiqə qazanmalıyıq. Bunun üçün yenidən qələbələri sıralamalıyıq. Bizim üçün uğursuz keçən 15 gündə çox xal itirdik. “Empoli”yə qarşı matçın yarıdan çox hissəsini on nəfərlə keçirdik (hücumçu Milik 18-ci dəqiqədə qırmızı vərəqə almışdı – red.), azlıqda hesabı açdıq, amma sona yaxın axmaq qol buraxdıq. Bu gün isə “Udineze”, demək olar ki, qapımıza zərbə endirmədi, rəqibin heç bir şansı yox idi. İlk hissədə 3-4 real qol imkanı yaxaladıq. Bu uğursuzluq komandanın mövsümün arxada qalan hissəsindəki zəhmətinə əsla kölgə salmamalıdı. “Yuventus” üçün vacib olan mövsüm davam edir. Komanda məhz belə uğursuz məqamlarda səhvlərdən nəticələr çıxarır, möhkəmlənir və hər şeyə rəğmən, inkişafımızı davam etdirməliyik.

- Texniki baxımdan futbolçuların çıxışından razısınız?
- Daha yaxşı oynaya bilərdik. İlk hissədə qənaətbəxş oynadığımızı düşünürəm. “Udineze” yaxşı müdafiə olunur. Bu səbəbdən ələ düşən imkanlardan yararlanmaq lazımdı. Məsələn, Kambyaso bir epizodda qol vurmağa çox yaxın idi.

- Komandanız yorğun görünürdü, əksər oyunçular topa çatmaqda çətinlik çəkirdilər. Yarımmüdafiəçilər isə topu, demək olar ki, irəli aparmaq üçün ciddi ideya düşünə bilmirdilər.
- Razıyam, demək olar ki, ikinci hissədə hücum quruculuğu planında ciddi nəsə edə bilmədik. İlk hisədə sol cinahda daha fəal oyun sərgilədik. Bu səbəbdən həmin cinahla qurulan hücumlar qapı qarşısında yaxşı imkanların yaranmasıyla nəticələndi. Əsas problem ondadı ki, qol vura bilmirsənsə... “Udineze” bu mövsüm çempionatda hamıdan çox - 13 dəfə heç-heçə edən və son 12 oyundan isə yalnız 4-də uduzan komandadı. Çox təəssüf ki, evdəki məğlubiyyətsiz seriyamızı davam etdirə və 5-ci yerdəki komanda ilə xal fərqini artıra bilmədik. Buna baxmayaraq, qollarımızı yenidən çırmalamalı, öz üzərimizdə daha çox çalışmalı və Çempionlar Liqasına vəsiqə qazanmaqla bağlı hədəfimizə köklənməliyik. “İnter”i təqib etmək vacib stimuldu, amma bu da var ki, milanlılar mövsümü əla keçirirlər. Və bizə onları yalnız təbrik etmək qalır. Məsələnin əsas məğzi odu ki, bu komanda cari mövsümdə qurulmayıb: “İnter”in əsası komandanı çempion edən Antonio Kontenin dövründə qoyulub. “Yuventus”da isə son iki ildə olduğu kimi, bu mövsümdə də yeni komanda quruculuğu prosesi davam edir. Bir daha deyirəm, bizim əsas hədəfimiz ötən mövsüm çıxış etdiyimiz Çempionlar Liqasına qayıtmaqdı.

- Bəs Simone İnzaqinin “İnter”in cari mövsümdəki uğurlu çıxışındakı rolunu necə dəyərləndirirsiz?
- Simone böyük işlər görür, ancaq... Məni yanlış anlamayın, amma futbolda müəyyən dəyərlər mövcuddu. Konkret desəm, bu oyunda futbolçuların müəyyən dəyərləri var. “Yuve”dəki fəaliyyətimin ilk 5 ilində İtaliyanın ən güclü komandası idik. Ümumiyyətlə, həmin komanda skudettonu ardıcıl 9 dəfə qazandı. Eyni vəziyyət indi “İnter”lə bağlıdı. Milanlıların 60 xalı və ehtiyatda bir oyunu var. Bu, əsas titul uğrunda mübarizədə yüksək tempdi. Belə məqamda həmkarım Simoneni və komandasını təbrik edə bilərəm. Yaxşı anlayıram ki, çempionluq yarışında rəqabəti dəstəkləmək mövzusunu KİV səviyyəsində daimi davam etdirmək xoşdu. “Yuventus”un çempionluq yarışında sona qədər olacağını demək mümkündü. Amma mən hələ mövsümün əvvəlində çıxışımızda yeri gələndə eniş olacağını demişdim. Buna görə sakitliyi qorumaq və üzərimizdə çalışmağa davam etmək vacibdi. Komandamızın indiyədək gördüyü işlərdən razıyam. Ona görə ki, hesabımızda 53 xal var və bu göstərici kifayət qədər yüksəkdi. Bununla belə, mövsümün qalan hissəsində xal ehtiyatımızı mümkün qədər çox artırmalıyıq.

- Komandanızda oyun planında irəli addım atmaqla bağlı problem olduğunu söyləmək mümkündü? Və ya bu, oyunçuların sahib olduqları mentallıqla bağlı olan məsələdi?
- Bu fikrinizlə razıyam. Vaxtilə işlədiyim “Milan”da bir çox gənc futbolçu ilə işləmişəm, indi isə “Yuventus”da sərəncamımda kifayət qədər gənc var. Onların inkişaf etmələri üçün vaxta ehtiyac duymaları normaldı. Amma hamıya balans da lazımdı. Çünki hərdən futbolçulara münasibətdə gözlənilmədən həddən artıq nikbinlik yaranır. Komandamız təcrübəli və təcrübəsi az olan oyunçulardan qurulub. “İnter” ilə oyunda qənaətbəxş nəticəyə nail ola bilərdik. Çünki səfər matçında sona qədər mübarizə apardıq. Bu gün “Udineze”yə uduzduq, “Empoli” ilə əvvəlki ev oyununda isə 70 dəqiqədən artıq müddətdə azlıqda oynadıq. Bundan sonra daha çox işləməliyk. Çünki hələ qarşıya qoyulan hədəfə çatmamışıq. Bu hədəfə yenidən köklənməli, turnir cədvəlinə baxmağı bir kənara qoymalı və mümkün qədər çox xal yığmalıyıq.