"Qarşı tərəf nə qədər güclü olsa da, qalib gəlmək iqtidarındayıq" – Arif Əsədov həm də narahatdı
Srağagün Parisdə Millətlər Liqasının 2024/25 mövsümünün püşkatma mərasimi keçirildi. Azərbaycan yığması azarkeşlərinə İsveç, Slovakiya və Estoniya ilə oyunların həyəcanını yaşadacaq.
Millinin məşqçisi Arif Əsədov "Football-plus.az"a açıqlamasında keçiriləcək oyunlar haqda danışdı:
"Səbətlərin ən güclü komandalarıyla görüşəcəyik. Rəqiblərimiz çox ciddidi. Buna baxmayaraq, hər biri millimizə tanış olduğuna və onları məğlub etdiyimiz matçlar keçirdiyimizə görə ümidliyik. Futbolçularımız daha əvvəl göstərib ki, qarşı tərəf nə qədər güclü olsa da, qalib gəlmək iqtidarındayıq. Məncə, bu, həqiqətən mümkündü. Çünki sözegedən kollektivləri tanıyırıq. Ümumi oyun tərzlərinə bələdik. Yaxşı oyun göstərib qələbə qazana bilərik".
Görəsən, dörd gün ərzində biri evdə, biri səfərdə olmaqla iki oyunun keçirilməsi hansısa çətinlik yarada bilərmi? Təqvimin müəllifi birbaşa UEFA-dı, yoxsa məşqçilərin fikirləri dinlənilib?
Arif bəydən matçların təqvimini dəyərləndirməsini də istədik.
"Xeyr, bizimlə hansısa məsləhətləşmə olmadı. Təqvimi UEFA təyin edib. Onlar belə qərar veribsə, biz nəsə deyə bilmərik. Ümumi duruma əsasən, bütün komandalar eyni şərtlər altında çıxış edəcək. Əlbəttə, çətin olacaq. Amma vəziyyətə uyğunlaşmaq və əlimizdən gələni əsirgəməmək lazımdı. Vacib olan meydanda yaxşı çıxış etməkdi. Əlavə detallara önəm versək, bizə maneə ola bilər".
KƏNAN BAHADIR
Digər xəbərlər
