"Bildiyiniz kimi, yığmamız bu komandalarla dəfələrlə qarşılaşıb. Baxımlı oyunların şahidi olmuşuq. Məğlubiyyətlə üzləşdiyimiz matçlarla yanaşı, parlaq qələbələrimiz də qeydə alınıb. Komandamız qarşıdakı görüşlərdə gücünü göstərməlidi. Sübut etməlidi ki, qələbələri təsadüfi olmayıb. Mənim üçün qarşıdakı oyunlar məhz bu baxımdan xüsusi əhəmiyyət daşıyır. Futbolçulara inanıram. Məlumdu ki, son qarşılaşmalarda göstərilən performans, nümayiş etdirilən oyun tərzi bizə daha ciddi yanaşmalarına səbəb olacaq. Oyunçular buna hazır olmalı, özünü ən yaxşı tərəfdən göstərməlidi. Rəqiblərə gəlincə, başqa komandalarla da qarşılaşa bilərdik. Sözün açığı, bizim üçün uğurlu püşkatma olduğunu deyə bilmərəm. O mənada ki, fərqli kollektivlərə qarşı meydana çıxmaq təcrübəni artırır, müxtəlif situasiyaların şahidi olursan. Dərinə getsək, onsuz da başqa rəqiblərlə də qarşılaşmışıq. Bəlkə bəxtimizə başqaları düşsə, yenə belə deyəcəkdik. Buna görə oyunlara ciddi hazırlaşmaq, turnirdə bacardığımız qədər irəli getmək vacibdi".