“Kəpəz” Misli premyer-liqasının 21-ci turunda Qəbələdə keçirilən matçda “Araz-Naxçıvan”ı məğlub etdi – 3:1. 19-cu turda Qərb derbisində “Turan Tovuz”u da məğlub edən “sarı-göylər” indi sonuncu pillədə qərarlaşan “Qəbələ”ni 5 xal qabaqlayır.

Bəllidi ki, 20-ci turda keçirilən “Kəpəz” – “Qarabağ” oyununda da nominal meydan sahibləri baxımlı oyunla yadda qaldı. Üstəlik 1 xalı Toral Bayramovun 90+5-ci dəqiqədə penalti zərbəsini dəqiq yerinə yetirməsiylə əldən verdilər. Ümumiyyətlə, futbol ictimaiyyəti Gəncə təmsilçisinin gücləndiyini, əvvəlkinə nisbətən daha iddialı olduğunu görür. Maraq üçün qeyd edək ki, komanda Tovuz şəhər stadionundakı son matçını 15-ci turda keçirib və “Sabah”a məğlub olub – 0:2. Daha sonra burda baş verən məlum hadisəylə bağlı ev oyunlarını Qəbələdə keçirməyə başlayıb. 16-cı turda isə “qırmızı-qaralar”ı məhz burda darmadağın edib – 3:0.

Əlbəttə, yazdıqlarım ümumi mənzərənin görünən tərəfidi. Nəticələr, qollar, qələbələr, turnir cədvəlindəki durum və s. və i.a. Bəs komandada nə dəyişdi?

1. Təbii ki, başlıca səbəbkar sabiq baş məşqçi Azər Məmmədovun istefasından sonra bu vəzifəyə gətirilən Adil Şükürovdu. Onun, demək olar ki, bütün mətbuat konfranslarında “Azər müəllim yaxşı komanda formalaşdırıb” deməklə sələfini xatırlaması təqdirəlayiqdi. Amma komanda bugünkü uğurlarını daha çox Adil Şükürova borcludu. Baş məşqçi işini hiss etməmək mümkün deyil. “Sarı-göylər” istər psixoloji, istərsə də fiziki cəhətdən yaxşı səviyyədədi. Futbolçuların oyun tərzinə, performansına nəzər yetirdikdə məşq prosesinin necə keçdiyi göz önünə gəlir. Sıx qrafik, məsuliyyətli yanaşma, təcrübəli baş məşqçi, istək, hədəf... Vacib məqam çoxdu. Məqsəd isə “Qəbələ”ni 10-cu sırada saxlamaq deyil. Bunu Adil bəy özü etiraf edib. “Turan Tovuz”a çatmaq istəyirlər. Sonra o biri, sonra digəri... Əlbəttə, bu yanaşma futbolçuların arxayınlaşmasının qarşısını almaqla yanaşı, istəyə çatmaq üçün daha çox çalışmağa sövq edir.

2. Qəbələ şəhər stadionu təbii ot örtüklüdü. Sözsüz, bu amil futbolçuların daha rahat hərəkət etməsinə, sürət yığmasına, zədələnmə ehtimalından qorxunun minimuma enməsinə şərait yaradır. Desəz ki, bəs “Qəbələ” bu meydanda niyə eyni nəticələri qazanmır? Çünki “qırmızı-qaralar” psixoloji gərginlikdən əziyyət çəkir, “Kəpəz”də isə belə hal yoxdu. Həmçinin get-gedə nəticələrin yaxşılaşması gəncəlilərin motivasiyasını daha da artırır.

3. Xatırlayırsızsa, Gəncə şəhər stadionunda keçirilən ev oyunları qalmaqallarla yadda qalırdı. Bəzi azarkeşlər komandaya dəstək vermək əvəzinə ciddi təzyiq göstərirdi. Elə sabiq baş məqşçi Azər Məmmədov da bunu dəfələrlə dilə gətirmiş, səfər oyunlarında daha rahat oynamalarının, nisbətən yaxşı nəticələr qazanmasının səbəblərini belə izah etmişdi. İndi isə yaxşı nəticələr və baxımlı oyun var. Əskik olan AZARKEŞ DƏSTƏYİDİ!

KƏNAN BAHADIR