Afrika Millətlər Kubokunda (AMK) uğurlu çıxış edən komandaların sırasında Cənubi Afrika da var.

"Football-plus.az" xəbər verir ki, Uqo Broosun çalışdırdığı yığma qrup mərhələsində keçirdiyi 3 oyunda 4 xal qazanmaqla pley-offa adlayıb. Bu uğurda əsas amillərdən biri, bəlkə də birincisi yerli klublardan biri ilə bağlıdı. Necə?

E qrupunda yarışan yığmanın Mali ilə ilk matçdakı (0:2) start heyətində “Mamelodi Sandauns”un 7 oyunçusu oynadı. Namibiya ilə növbəti oyunda (4:0) onların sayı 8-ə çatdı. “Tunis”ə qarşı son matçda (0:0) da bu klubun 8 üzvü ilk dəqiqələrdən oynamaq imkanı qazandı. Yığmanın qrupda vurduğu 4 qoldan 3-ü məhz “Mamelodi Sandauns”luların payına düşür. Komandanın arxa xəttinin qapıçı Ronuen Uilyams başda olmaqla tamamilə bu klubun üzvlərindən qurulduğunu da qeyd edək. Ortaya təbii sual çıxır: yığmanın əsasını nə üçün ölkənin digər aparıcı klubları “Kayzer Çifs” və ya “Orlando Payrets” yox, məhz “Mamelodi Sandauns”un oyunçuları təşkil edir?

“Mamelodi Sandauns” 10 ildi ölkədə ağalıq edir
Əvvəlcə Broosun Cənubi Afrika yığmasına 2021-ci ildən bələd olduğunu qeyd edək. Bu komandaya ilk dəfə həmin ilin mayında təyinat alan 71 yaşlı mütəxəssis baş məşqçi vəzifəsini iyula qədər müvəqqəti yerinə yetirib. Avqustda isə daimi əsasda çalışmağa başlayıb və 2022-ci ilin iyulunadək işbaşında olub. Həmin ayda postunu tərk edən belçikalı sentyabrda əvvəlki postuna qayıdıb. Broosun 2017-ci ildə Kamerun yığmasını AMK-da qələbəyə daşıdığını xüsusi vurğulamalıyıq. Əlbəttə, onun hazırkı komandası ilə bu uğuru təkrarlamaq ehtimalı azdı. Əsas səbəb Cənubi Afrikanın qitə birinciliyində sonuncu dəfə 1996-cı ildə çempion olması ilə bağlıdı. Hazırkı heyət, demək olar ki, başdan ayağa qədər yerli çempionatda çıxış edən futbolçulardan qurulub. Broosun sərəncamında legioner həyatı yaşayan yalnız üç oyunçu var ki, onlar da dünya miqyasında aparıcı sayılmayan klublarda çıxış edirlər.
Amma indi ölkədə milli komandaya bəslənən ümidlər kifayət qədər böyükdü. Nikbinliyə yol açan əsas səbəb isə yığmanın əsas heyətinin böyük ölçüdə bir klubun üzvlərindən qurulması ilə bağlıdı. Bu isə futbolda az-çox uğurlu nəticəyə şərait yaradan amillərdən sayılır.

Vətənində RVDM, “Brügge”, “Muskron”, “Anderlext”, “Genk”, “Sulte Varegem”, “Oostende”, Yunanıstanda “Panserraikos”, Türkiyədə “Trabzonspor”, Əlcəzairdə isə “Kabiliyə” və “Hüseyn Dey” klublarını çalışdırmış Broosun “Mamelodi Sandauns”un oyunçularına üstünlük verməsi heç də əsassız deyil. Məlumunuz olsun ki, bu komanda son 6 mövsümdə çempion olub. Pretoriya şəhərinin təmsilçisi 16 çempionluqla ölkənin ən titullu klubudu. “Kayzer Çifs” 13 belə titulla ikinci yerdədi. “Sandauns”un son 10 mövsümdə 8 dəfə çempion olduğunu da bildirək. Hazırda 37 yaşlı Rulane Mokvenanın başçılıq etdiyi komanda çempionatda 13 oyuna 35 xalla liderdi. Özü də əsas izləyiciləri “Keyp Taun Siti” ilə “SuperSport Yunayted”i 3 oyun az keçirməklə 6 xal qabaqlayır! Maraq üçün “Sandauns”un 2012-ci ildə ölkə kubokunun oyununda rəqibini 24:0 (!) hesabıyla darmadağın etməklə milli rekord müəyyən etdiyini də bildirək.

“Transfermarkt” portalının dəyərləndirməsinə əsasən, paytaxt təmsilçisi ölkənin ən bahalı heyətinə malik komandasıdı: oyunçularının ümumi qiyməti 31,6 milyon avro olan “Mamelodi Sandauns”dan sonrakı yerləri “Orlando Payrets” (təxminən 20 milyon) və “Kayzer Çifs” (təxminən 17 milyon) tuturlar. Ölkə nəhənginin böyük maliyyə imkanları Patris Motsepe ilə bağlıdı. Klubun qızıl və digər dəyərli metalların istehsalı ilə məşğul olan sahibinin varidatı 3,1 milyard dollara bərabərdi. O, bu sərvəti ilə Afrikanın ən zəngin adamlarının ilk “10-luğ”una daxildi. Hə, onu da qeyd edək ki, bacılarından biri Cənubi Afrikanın prezidenti Siril Ramafosun, digəri isə sabiq nazir Ceff Radebenin (o, Nazirlər Kabinetində hamıdan çox – 1994-2019-cu illərdə işləyib) xanımıdı.

Motsepeyə İnfantino da dəstək verir
Motsepenin Canni İnfantinonun yaxın dostu olduğunu da deməliyik. FİFA-nın prezidenti 2021-ci ildə ona fəal şəkildə dəstək verib. Nəticədə Motsepe Afrika Futbol Konfederasiyasının prezidenti seçilib. Xatırladaq ki, onun belə yüksək kürsüyə yiyələnməsi digər namizədlərin seçki ərəfəsində bir-bir geri çəkilməsinə görə mümkün olub. Bir də baxıb görüb ki, ətrafında heç bir rəqib qalmayıb və rəqabətsiz şəraitdə regionun ali futbol qurumunun başına keçib.

İnfantino ilə Motsepe 2023-cü ildə Afrika Superliqasını təsis ediblər. İlk mövsümün qalibi isə “Mamelodi Sandauns” olub. Ancaq Çempionlar Liqasında son illər komandanın işləri çox da əla alınmır. Cənubi afrikalılar bu turnirdə 2016-cı ildə qazandığı qələbədən sonra mübarizəni bir qayda olaraq 1/4 finalda və yarımfinalda dayandırırlar.

Əvəzində qadınlardan ibarət “Mamelodi Sandauns” son üç ildə qitənin ən güclü klubu adını qazanıb. Bu uğurlardan təsirlənən “Netflix” şirkəti komanda haqda sənədli filmin çəkilişnə başlayıb. Kişi və qadın komandalarının azarkeşləri “Sandauns”un yerli publikada “Shoe Shine & Piano” adı verilən unikal hücum üslubu ilə fəxr edirlər. Bu, sürətli və qısa ötürmələrdən qurulan kombinasiyalardan ibarət olan “tiki-taka” oyun üslubunun Cənubi Afrika versiyasıdı. Klubda bu üslub akademiyada da təbliğ olunur.

Maraqlıdı, Cənubi Afrika yığması “Mamelodi Sandauns”un böyük dəstəyi ilə qitə çempionatında nə qədər irəliləyəcək?