Eriksson martda “Liverpul”un əfsanələrini meydana çıxaracaq
Sven-Yoran Eriksson yaxınlarda ölüm ayağında olduğunu etiraf etdi. Ünlü mütəxəssis “xərçəng”in terminal mərhələsindədi, həkimlər onun ən yaxşı halda daha bir il yaşayacağını proqnozlaşdırır.
"Football-plus.az" xəbər verir ki, Erikssonun zəngin karyerası ilə bağlı ən böyük təəssüfü heç vaxt “Liverpul”u çalışdıra bilməməsidi. 75 yaşlı isveçli “Sky Sports” müsahibədə xəstəliyi və karyerasının ən böyük təəssüfü haqda danışıb:
“Həmişə “Liverpul”u çalışdırmağı arzulamışam. Atam hələ də bu kluba azarkeşlik edir, mən də həmişə dəstəkləmişəm. Bəli, mən “Liverpul”u çalışdırmağı arzulamışam, ancaq bu artıq heç vaxt baş verməyəcək”.
Erikssonun müsahibəsini oxuyanlar yazının şərh hissəsində klubun və Yürgen Kloppun Erikssonu arzusuna çatdıracağına inandıqlarını yazdılar. Və onlar yanılmadı.
İş ondadı ki, martın 23-də “Enfild”də “Liverpul”un və “Ayaks”ın əfsanələri arasında xeyriyyə oyununun keçirilməsi planlaşdırılır. “The Times”ın yazdığına görə, İngiltərə klubu artıq Erikssonun ailəsi ilə əlaqə saxlayaraq, məşqçinin sağlıq durumunun bu oyunda komandaya rəhbərlik etməyə imkan verib-vermədiyini müzakirə edib. Klopp da nəcib davranıb, həmkarını birgünlüyə “Liverpul”a rəhbərlik etməyə çağırıb:
“Biz heç vaxt görüşməmişik, ancaq bu, çox duyğulandıran xəbərdi. Mən ilk dəfə Erikssonun “Liverpul”a heyranlığını, sevgisini, həyatı boyunca klubun fanatı olduğunu öyrəndim. Əfsanələrin oyunu ilə bağlı ideyadan xəbərdardam, ancaq həmin oyuna görə cavabdehlik daşımıram, bu haqda heç nə deyə bilmərəm. Təklif edə biləcəyim yeganə şey budu: o bura gələ, ofisdə mənim yerimdə otura və istəsə, gün ərzində işlərimi görə bilər. Bu problem deyil. Biz burda ona hər şeyi – bu möhtəşəm klubun illər ərzində necə inkişaf etdiyini göstərəcəyik. Əminəm ki, o, bura gələ və bir neçə gözəl saat keçirə bilər”.
Xatırladaq ki, Eriksson artıq üç dəfə “Enfild”də iş başında olub: 2001-ci, 2002-ci və 2006-cı illərdə bu stadionda İngiltərə yığmasına rəhbərlik edib (Finlandiya, Paraqvay və Uruqvay ilə oyunlarda).
İsveçli mütəxəssis artıq martda “Liverpul”un əfsanələrinə rəhbərlik etmək təklifinə də reaksiya verib:
“Məni həmin oyuna baxmağa dəvət ediblər. Əla olardı, ona görə ki, meydanda çoxlu əla futbolçu olacaq. Əlbəttə, razılaşardım! Bu həmişə arzum, yuxum olub. Ancaq gileylənmirəm, çoxlu yaxşı komandam – yığmalar və klublar olub, odu ki, xoşbəxtəm”.
Digər xəbərlər
