“Hər hansı rəsmi məlumat təqdim edilməyib” – millimiz niyə cəzalandı?
UEFA-nın Nəzarət, Etika və İntizam Komitəsi ötən il dekabrın 15-də futzal üzrə DÇ-2024-ün elit mərhələsində keçirilmiş Azərbaycan – Rumıniya oyununun nəticəsini ləğv edib.
Azərbaycan Futzal Federasiyasının yaydığı məlumata görə, komitənin qərarı ilə millimizə texniki məğlubiyyət (0:5) verilib. Buna səbəb qeyd olunan oyun zamanı yığmanın UEFA İntizam Qaydasını pozmasıdı. Maraq üçün qeyd edək ki, komandamızın yer aldığı A qrupunda bu sanksiya millimizdən əvvəl iki dəfə Rumıniya yığmasına tətbiq olunub. Belə ki, Niderlandın şikayəti əsasında, analoji səbəbdən UEFA-nın adı çəkilən komitəsi Rumıniya – Niderland və Niderland – Rumıniya oyunlarının nəticəsini ləğv etmiş, hər iki oyunda Rumıniyaya texniki məğlubiyyət (0:5) vermişdi.
Göründüyü kimi, qərarda komandamızın UEFA İntizam Qaydasını pozduğu qeyd olunsa da, konkret ad göstərilməyib. Bəs söhbət konkret hansı qaydaya əməl edilməməsindən gedir? Bu sualla müraciət etdiyimiz Futzal Federasiyasının mətbuat xidmətinin rəhbəri Mahal Məmmədovu dinləyək:
“Həmin qarşılaşmada “milliləşdirdiyimiz” braziliyalılar Amadeu ilə Rafael Vilela meydana çıxıb. Diqqəti çəkən məqam odu ki, Amadeu 2013-cü, Vilela isə 2017-ci ildən yığmanın heyətində çıxış edir. Rumıniya ilə matça qədər onlar dəfələrlə Avropa və dünya çempionatının seçmə, eləcə də final mərhələlərində iştirak edib. UEFA-nın bu illər ərzində heç bir reaksiya verməməsi, əksinə, cari seçmə mərhələdə bu qədər oyunun nəticəsini ləğv etməsi anlaşılmazdı. Qısası, bu qərar bizim üçün gözlənilməz oldu. Çünki dəyişikliyin olmasıyla bağlı federasiyamıza hansısa rəsmi məlumat təqdim edilməyib. Bilinir ki, UEFA futzalda sərt tədbirlər görür, daha dəqiq desək, şərtlərin ağırlığını artırır. Buna hörmətlə yanaşmaq və başverənlərlə razılaşmaqdan başqa çıxış yolu yoxdu. Ümumiyyətlə, DÇ-2024-ün elit mərhələsinin oyunları zamanı belə qərarlar çoxluq təşkil etdi. Məsələn, E qrupunda yeddi matçın, yer aldığımız qrupda isə bizə qədər iki belə görüşün nəticəsi ləğv olunmuşdu”.
Maraqlıdı, belədə günahkar axtarmağın mənası varmı? Yəni federasiya rəhbərliyinin və ya milliminin baş məşqçisi Vitali Borisovun hansısa məsuliyyətsizliyindən danışmaq olarmı? Axı UEFA-nın islahatları diqqətdə saxlanılmalı və buna uyğun addımlar atılmalıdı! Mahal bəyin fikrincə, qərar gözlənilmədən, daha doğrusu, xəbərdarlıq edilmədən qüvvəyə mindiyinə və braziliyalılar uzun zamandı milli üzvü olduğuna görə hansısa əlavə tədbir görülməyib:
“Dediyim kimi, həm Amadeu, həm də Vilela uzun müddətdi yığmamızın heyətində meydana çıxır. Cəzalandırılan digər ölkələrin millilərini araşdırdıqda məlum oldu ki, onlarda cəzaya səbəb olan futzalçılar heyətə yeni qatılıb. Yəni bu üzdən hansısa problemin yaşanacağını düşünmədik. Reallıq isə ondan ibarətdi ki, daha diqqətli olmaq lazımdı”.
Qeyd edək ki, Azərbaycan - Rumıniya görüşü 5:5 hesabı ilə başa çatmışdı. Texniki məğlubiyyətdən sonra millimiz DÇ-2024-ün elit mərhələsini 1 qələbə, 5 məğlubiyət göstəricisi ilə 3 xalla bitirmiş sayılır.
KƏNAN BAHADIR
Digər xəbərlər
