Avropa Superliqası nə vaxt start götürəcək?
Avropa Superliqasının start götürəcəyi tarix açıqlanıb. Bu haqda layihənin baş katibi Anas Laqrari açıqlama verib.
"Football-plus.az" xəbər verir ki, ötən il dekabrın 21-də Avropa Məhkəməsi FİFA və UEFA-nın Superliqanın təşkilinə maneə törədən hərəkətlərini qanunsuz elan etmişdi. Bundan sonra turnirin yeni formatı təqdim olunmuşdu. Buna əsasən, yeni yarışda 3 liqaya bölünən 64 klub iştirak edəcək. Hər bir liqada mübarizə müntəzəm çempionat və pley-off olmaqla iki mərhələdə keçiriləcək. Hazırda Superliqanın iştirakçıları siyahısında yalnız “Real” və “Barselona” var. Ona görə ki, Avropanın “Mançester Yunayted”, “Tottenhem”, “Çelsi”, “Mançester Siti”, “Arsenal”, “Liverpul”, “Atletiko”, “İnter”, “Bavariya” və PSJ daxil olmaqla bir çox aparıcı klubları turnirdə iştirakdan imtina edib.
Laqrari yarışın gələn ilin sentyabrında start götürməsinin planlaşdırıldığını deyib:
“Turnirə sabah başlaya bilərdik, lakin məqsəd 2025-ci ilin sentyabrında start götürməkdi. Və bunu Avropanın ən yaxşı komandaları, o cümlədən İngiltərə klubları ilə etmək istəyirik. Biz futbolu təkmilləşdirmək üçün birlikdə işləyə bilərik”.
Laqrari onu da vurğulayıb ki, azarkeşlər Superliqa oyunlarını izləmək üçün bir qəpik də ödəməli olmayacaqlar, lakin onları reklamsız izləmək üçün aylıq 10 avro dəyərində abunə götürmək imkanı əldə edəcəklər.
Digər xəbərlər
